ज्येष्ठ पत्रकाराची आईसह हत्या

नवी दिल्ली : ज्येष्ठ पत्रकार के. जे. सिंग (६४) आणि त्यांची आई गुरचरण कौर (९२) यांची त्यांच्या राहत्या घरी हत्या झाल्याच्या घटनेने खळबळ उडाली आहे. सिंग यांच्या मोहालीतील घरातच दोघांचे मृतदेह सापडले. सिंग यांची गळा चिरून, तर त्यांच्या आईची गळा आवळून हत्या करण्यात आली. या प्रकरणी हत्येचा गुन्हा नोंदवण्यात आला असून तपासासाठी विशेष तपास पथकाची स्थापना करण्यात आली आहे.

सिंग हे पूर्वी इंडियन एक्स्प्रेसमध्ये वृत्तसंपादक होते. ट्रिब्यून आणि टाइम्स ऑफ इंडिया, चंदिगढ येथेही त्यांनी काम केले होते. पंजाब, हरयाणा व चंदिगढमधील पत्रकारांनी या दुहेरी हत्येचा तीव्र निषेध करताना तातडीने या प्रकरणी तपास करण्याची मागणी केली आहे.