कुंभमेळ्यात तृतीयपंथीयांच्या आखाड्याने वाद

मटा ऑनलाइन वृत्त । उज्जैन

उज्जैन येथे सुरू असलेल्या सिंहस्थ कुंभमेळ्यात पहिल्यांदाच तृतीयपंथीयांच्या आखाड्याला परवानगी देण्यात आली आहे. या आखाड्याचे महामंडलेश्वर म्हणून लक्ष्मी नारायण त्रिपाठी यांना नियुक्त करण्यात आले आहे. मात्र तृतीयपंथीयांनी वेगळा आखाडा स्थापन केल्याने आखाडा परिषदने नाराजी व्यक्त केली आहे.

देशात साधु-संतांचे १३ आखाडे आहेत. यामध्ये तृतीयपंथीयांचा आखाड्याचा समावेश नव्हता. तरी देखील आपल्याला कुंभमेळ्यातील विविध सुविधा देण्यात याव्यात, अशी मागणी त्यांच्याकडून करण्यात येत होती. मात्र त्यांना सुविधा देण्यात येत नव्हत्या. अखेर यंदा त्यांना वेगळ्या आखाड्यासाठी जागा उपलब्ध करून देण्यात आली. हा निर्णय ऐतिहासिक असल्याची प्रतिक्रिया तृतीयपंथीयांनी व्यक्त केली.

आमचा वेगळा आखाडा करण्यास मान्यता दिल्याने आम्हाला आनंद झाल्याचे तृतीयपंथीयांच्या आखाड्यातील अजय दास यांनी सांगितले. लक्ष्मी त्रिपाठी यांना संपूर्ण विधीवत या आखाड्याचे महामंडलेश्वर म्हणून नियुक्त करण्यात आले आहे. तसेच चार पीठाधीश आणि चार महंत देखील नियुक्त करण्यात आल्याची माहिती दास यांनी दिली. इतर आखाड्यांप्रमाणे त्यांचे स्वरुपही निश्चित करण्यात आले आहे. या आखाड्याचे शस्त्र तलवार, तर शास्त्र शिवपुराण असल्याचे सांगण्यात आले. तृतीयपंथीयांच्या आखाड्याने शोभा यात्रा देखील काढली. ही शोभायात्रा पाहून अन्य भाविक थक्क झाले. मात्र आखाडा परिषदेने महिला आणि तृतीयपंथीयांच्या आखाड्याला मान्यता दिलेली नाही.