गेल्या १०२ वर्षांतला सप्टेंबरचा सर्वाधिक पाऊस यंदा

नवी दिल्ली:
ज्या महिन्यात मान्सूनने माघारी फिरायचे त्या महिन्यात तो यंदा सर्वात जास्त कोसळला आहे. इतका कोसळला की त्याने विक्रम केला. गेल्या १०२ वर्षांत सर्वाधिक पावसाचा सप्टेंबर महिना होण्याचा विक्रम यंदा पावसाने केला आहे.

जून ते सप्टेंबर या कालावधीत देशात सरासरीहून ९ टक्के पाऊस अधिक झाला. देशभरात सप्टेंबरमध्ये सरासरी पाऊस २४७.१ मि.मी. झाला. हा पाऊस सामान्य पावसापेक्षा ४८ टक्के अधिक आणि १९०१ नंतर तिसऱ्या सर्वाधिक पावसाचा विक्रम झाला आहे. सोमवारपर्यंत मान्सून १९८३ च्या पावसाचा विक्रमही मोडेल. गुजरात आणि बिहारमध्ये रेड अलर्ट जारी केलेल्या ठिकाणी सोमवारी पुन्हा पाऊस पडला तर सप्टेंबर १९१७ च्या विक्रमापर्यंत हा पाऊस पोहोचेल. १९१७ मध्ये १९०१ नंतर चा सप्टेंबरचा सर्वाधिक पाऊस झाला होता.



देशभरात ९ टक्क्यांहून अधिक

यावर्षी मान्सून विलंबाने आला आणि जूनमध्ये पावसाची ३३ टक्के तूट होती. पण आता गेल्या २५ वर्षात चार महिन्यातला सर्वाधिक पाऊस याच वर्षी झाला आहे. देशभरातली आकडेवारी पाहता यावर्षी ९५६.१ मिमी म्हणजेच ९ टक्के अधिक पाऊस झाला.