देहविक्री, ड्रग्ज पुरवठा; 'त्या' रिसॉर्टबद्दल धक्कादायक माहिती; माजी कर्मचाऱ्यांकडून पोलखोल

ऋषिकेश: रिसेप्शनिस्ट अंकिता भंडारीच्या हत्येनंतर चर्चेत आलेल्या वनंत्रा रिसॉर्टबद्दल आता धक्कादायक माहिती समोर येऊ लागली आहे. माजी कर्मचाऱ्यांनी रिसॉर्टमध्ये चालणाऱ्या कृष्णकृत्यांची माहिती दिली आहे. रिसॉर्टचा मालक पुल्कित आर्यची महिलांवर वाईट नजर होती. पगार मागितल्यावर पुल्कित मारहाण करून, चोरीचा आळ टाकून कर्मचाऱ्यांना काढून टाकायचा, अशी खळबळजनक माहिती दोन महिन्यांपूर्वी रिसॉर्टमधील नोकरी सोडणाऱ्या विवेक आणि इशिता यांनी दिली आहे. हे दोघे मेरठचे रहिवासी आहेत.

रिसॉर्टमध्ये बाहेरुन तरुणी बोलवल्या जायच्या. मात्र त्यांची नोंद केली जायची नाही. या तरुणींना ग्राहकांच्या रुममध्ये पाठवण्यात यायचं. खास ग्राहकांची नोंद रजिस्टरमध्ये केली जायची नाही. परवाना नसताना दुप्पट किमतीत मद्यविक्री केली जायची. ग्राहकांना चरस, गांजादेखील पुरवण्यात यायचा, अशी माहिती विवेक आणि इशिता या दाम्पत्यानं दिली.
रिसेप्शनिस्ट रिसॉर्टच्या कस्टमरकडे जाईना; भाजप नेत्याच्या मुलानं निर्घृणपणे संपवलं
मला इशिता आवडते, असं पुल्कित रिसॉर्टमधील कर्मचाऱ्यांना सांगायचा. एक कर्मचाऱ्यानं ही बाब मला सांगितली होती. पुल्कित मला माझ्या पतीपासून वेगळं करण्याच्या प्रयत्नात होता. एकदा ग्राहक ब्लूटूथ स्पीकर विसरुन गेला. तो स्पीकर माझ्या पतीनं त्याच्याजवळ ठेवला. ग्राहक आल्यावर परत देऊ या उद्देशानं त्यानं स्पीकर स्वत:कडे ठेवला. पण पुल्कितनं माझ्या पतीवर चोरीचा आरोप केला, असं इशिता यांनी सांगितलं.

अंकिताचं गाव रिसॉर्टपासून १५० किलोमीटर अंतरावर होतं. त्यामुळे ती रिसॉर्टमध्ये असलेल्या एका खोलीतच राहायची. अंकिताला रिसॉर्ट सोडून जायचं होतं. तिचा मित्र पुष्पदीपसोबतच्या ऑडिओ संवादातून ही बाब समोर आली आहे. पुष्पदीप जम्मूमध्ये नोकरी करत होता. ज्या रात्री अंकिताची हत्या झाली, त्याच रात्री दोघांमध्ये संवाद झाला होता. मी फसलेय, असं त्यावेळी अंकितानं पुष्पदीपला सांगितलं होतं.
रिसॉर्ट रिसेप्शनिस्टचा मृत्यू; पोलिसांना वेगळाच संशय, भाजप नेत्याच्या मुलाला अटक
अंकिताची हत्या झाली त्या दिवशी तिचा पुल्कित आणि व्यवस्थापक अंकित गुप्तासोबत वाद झाला. अंकिता आक्रोश करत होती, रडत होती. रिसॉर्टच्या शेफसह सगळे कर्मचारी ऐकत होते. मात्र कोणीच विरोध केला नाही. यानंतर आरोपी अंकिताला जबरदस्तीनं सोबत घेऊन गेला. चिल्ला कालव्याजवळ नेल्यावर त्यानं अंकिताला धक्का दिला. पाण्यात बुडून अंकिताचा मृत्यू झाला. तिचा मृतदेह ५ दिवसांनी सापडला.