शरद पवार-संजय राऊतांची दिल्लीत बैठक, असं काय बोलणं झालं? राजकीय चर्चांना उधाण

नवी दिल्ली : संसदेच्या अर्थसंकल्पीय अधिवेशनाच्या दुसऱ्या सत्रासाठी राष्ट्रवादी काँग्रेसचे अध्यक्ष शरद पवार आणि शिवसेना खासदार संजय राऊत हे दिल्लीत आहेत. दिल्लीत असलेल्या या दोन्ही नेत्यांची संसद भवनात बंद दाराआड चर्चा झाल्याचं सांगण्यात येत आहे. जवळपास २० मिनिटे ही चर्चा झाल्याचं बोललं जात आहे.

शरद पवार आणि संजय राऊत यांच्यात नेमकी कुठल्या मुद्द्यावर चर्चा झाली हे कळू शकलेलं नाही. पण बंद दाराआड झालेल्या या बैठकीने राजकीय चर्चांना उधाण आलं आहे. नुकत्याच झालेल्या उत्तर प्रदेश, गोवा, उत्तराखंड आणि मणिपूर या ४ राज्यांच्या विधानसभा निवडणुकांमध्ये भाजपने आपली सत्ता राखली आहे. यामुळे भाजपचं बळ वाढलं आहे. या पार्श्वभूमीवर महाराष्ट्रातील राजकीय स्थिती आणि विधानसभा अध्यक्षपदाच्या निवडणुकीबाबत दोन्ही नेत्यांमध्ये चर्चा झाल्याचं मीडिया रिपोर्ट्समधून बोललं जातंय.

शरद पवार आणि संजय राऊत यांच्या भेटीत नक्की कुठल्या मुद्द्यावर चर्चा झाली, कोणत्याही नेत्याने जाहीर केले नाही. पण नुकत्याच झालेल्या निवडणुकीच्या पार्श्वभूमीवर ही भेट महत्त्वाची असल्याचं बोललं जातंय. संसदेच्या अधिवेशनादरम्यान राऊत हे शरद पवारांना भेटणार असल्याचं सांगण्यात येत होतं. यानुसार दोन्ही नेत्यांमध्ये संसद भवनात भेट झाली आणि २० मिनिटे चर्चा झाली.