अर्णब गोस्वामीविरोधात शशी थरूर कोर्टात

मटा ऑनलाइन वृत्त । नवी दिल्ली

पत्रकार अर्णब गोस्वामी व त्यांची वृत्तवाहिनी 'रिपब्लिक टीव्ही'च्या विरोधात काँग्रेसचे थिरुवअनंतपुरमचे खासदार शशी थरूर यांनी २ कोटी रुपयांचा अब्रूनुकसानीचा दावा दाखल केला आहे. आपली पत्नी सुनंदा पुष्कर हिच्या मृत्यूसंदर्भात बदनामीकारक वृत्त दिल्याचा आरोप थरूर यांनी याचिकेत केला आहे.

थरूर यांची पत्नी सुनंदा पुष्कर यांचा काही वर्षांपूर्वी गूढ मृत्यू झाला होता. या प्रकरणात महत्त्वाची माहिती आपल्याकडं असल्याचं वृत्त 'रिपब्लिक टीव्ही'नं प्रसारित केलं होतं. टीआरपी मिळवण्यासाठी हे वृत्त अत्यंत भडक पद्धतीनं देण्यात आलं. सुनंदा पुष्कर यांची हत्या थरूर यांनीच केली वा त्यांच्या इशाऱ्यावर करण्यात आली, असाच अर्थ त्या वृत्तातून निघत होता. सार्वजनिक जीवनातील माझ्या प्रतिमेला त्यामुळं धक्का बसल्याचं थरूर यांनी याचिकेत नमूद केलं आहे.

'दिल्ली पोलीस सध्या सुनंदा पुष्कर यांच्या मृत्यूची चौकशी करीत आहेत. ही चौकशी पूर्ण होईपर्यंत त्यांच्या मृत्यूसंदर्भात वृत्तवाहिन्यांवर कुठलंही वृत्त प्रसारित केलं जाऊ नये, अशी मागणी थरूर यांनी न्यायालयाकडं केली आहे.