लालूंना जनतेचा आशीर्वाद: शत्रुघ्न सिन्हा

रांची: 'लालूप्रसाद यादव हे जमिनीवर पाय असलेले, तळागाळातील लोकांशी जोडलेले नेते आहेत. जनतेचा आशीर्वाद त्यांच्या पाठिशी आहे,' अशा शब्दांत भाजपचे 'नाराज' खासदार शत्रुघ्न सिन्हा यांनी लालूंचं कौतुक केलं आहे. चारा घोटाळ्यात न्यायालयानं लालूंना शिक्षा सुनावल्यानंतर काही वेळातच सिन्हा यांनी त्यांचे गोडवे गायल्यानं आश्चर्य व्यक्त होत आहे.

चारा घोटाळ्यातील एका प्रकरणात सीबीआयच्या विशेष न्यायालयानं आज लालू यादव यांना १४ वर्षांची शिक्षा ठोठावली. हा निकाल आल्यानंतर काही तासांतच शत्रुघ्न सिन्हा यांनी 'रीम्स' रुग्णालयात धाव घेऊन लालूंची भेट घेतली. त्यामुळं तर्कवितर्कांना उधाण आलं होतं. मात्र, यात राजकीय काही नसल्याचं शत्रुघ्न सिन्हा यांनी भेटीनंतर पत्रकारांना सांगितलं. यावेळी त्यांनी लालूंची तोंडभरून स्तुतीही केली. 'लालू हे माझ्या कुटुंबातील सदस्यासारखेच आहेत. त्यामुळंच त्यांच्या प्रकृतीची विचारपूस करण्यासाठी मी इथं आलोय. न्यायालयाचा निकाल आल्यानंतरही त्यांचा आत्मविश्वास कायम आहे हे पाहून मला बरं वाटलं,' असं सिन्हा म्हणाले. 'लालूंना उपचारासाठी 'एम्स'मध्ये दाखल करावे अशी मागणी काही लोक करताहेत. प्रकृतीत सुधारणा न झाल्यास त्यांना येथून हलवलं जाऊ शकतं,' असंही सिन्हा यांनी स्पष्ट केलं.

चारा घोटाळ्यात न्यायालयाचा निकाल येताच केंद्रीय मंत्री गिरीराज सिंह यांनी 'जैसी करनी वैसी भरनी' असा टोला लालूंना हाणला होता. त्यानंतर लगेचच सिन्हा यांनी लालूंची पाठराखण करत भाजपला डिवचलं आहे. त्यामुळं त्यांनी भाजपशी फारकत घेण्याची पूर्ण तयारी केली असल्याचीही चर्चा आहे.