sanjay raut : गोव्यात महाविकास आघाडीचा फॉर्म्युला फेल! शिवसेना-राष्ट्रवादीसोबत, पण काँग्रेस...

पणजी : महाराष्ट्रातील शिवसेना, राष्ट्रवादी काँग्रेस आणि काँग्रेस हा महाविकास आघाडीचा प्रयोग गोवा विधानसभा निवडणुकीतही राबवण्याचा प्रयत्न करण्यात येत होता. मात्र, आता असे होताना दिसत नाही. शिवसेनेचे नेते आणि खासदार संजय राऊत यांनी ( sanjay raut ) पत्रकार परिषद घेत याबाबत माहिती दिली. गोवा विधानसभा निवडणूक शिवसेना आणि राष्ट्रवादी काँग्रेससोबत लढवणार आहेत. पण काँग्रेसने मात्र निवडणूकपूर्व आघाडी करण्यास नकार दिला आहे, असे संजय राऊत यांनी सांगितले.

विधानसभा निवडणुका घेण्याची घाई का?

उत्तर भारतात करोना रुग्णांची संख्या वेगाने वाढत आहे. उत्तर प्रदेशात करोना रुग्णांची नोंदच होत नाहीए. विधानसभा निवडणुका होणाऱ्या उत्तर प्रदेश, पंजाब, उत्तराखंड आणि मणिपूरमध्ये रुग्णसंख्या वाढत आहे. पण तरीही निवडणूक घेतल्या जात आहेत. निवडणुका घेण्याची इतकी घाई का केली जात आहे? असा प्रश्न राऊत यांनी उपस्थित केला आहे. केंद्रीय निवडणूक आयोगाने गेल्या आठवड्यात शनिवारी उत्तर प्रदेश, उत्तराखडं, पंजाब, मणिपूर आणि गोवा या ५ राज्यांच्या विधानसभा निवडणुकांची घोषणा केली. निवडणूक आयोगाने निवडणुका होत असलेल्या सर्व राज्यांमधील करोनाची स्थिती आणि तयारीचा आढावा घेतला. तसंच केंद्रीय आरोग्य मंत्रालयासोबत बैठक घेत पुन्हा आढवा घेतला. यानंतर निवडणुका जाहीर केल्या. या सर्व घडामोडींच्या पार्श्वभूमीवर संजय राऊत बोलत होते.

निवडणूक आयोगाने निवडणुकांमध्ये प्रचारवर निर्बंध आणले आहेत. पण ते कागदावरच आहेत. पंतप्रधान आणि भाजप अध्यक्ष मात्र दौरे आणि सभा करत आहे. त्यांना नियम नाहीत आणि इतरांसाठी नियम लागू आहेत. त्यामुळे निवडणुकीच्या आचारसंहितेत समान नियम असले पाहिजे, असं म्हणत राऊत यांनी भाजपवर निशाणा साधला.

Assembly Election: उत्तर प्रदेशसह पाच राज्ये कुणाची?; सात टप्प्यांत मतदान; 'या' तारखेला फैसला

गोव्यात महाविकास आघाडीच्या फॉर्म्युला राबवण्याचा प्रयत्न केला. पण काँग्रेसच्या मनात वेगळे आहे. स्वबळावर सत्ता आणू शकतो, असा त्यांचा दावा आहे. काँग्रेस नेतृत्वाकडून दिल्लीत तसे संकेत दिले गेले आहेत. यामुळे आघाडीबाबत आपली भूमिका जाहीर केलेली नाही. काँग्रेसने काही जागा दिल्या आहेत. पण राष्ट्रवादी काँग्रेसही आमच्यासोबत आहे. यामुळे एकत्र निर्णय घेणं गरजेचं आहे. पण शिवसेना, राष्ट्रवादी आणि स्थानिक पक्षांसोबत आघाडी करून आम्ही निवडणूक लढवू. तसंच उत्तर प्रदेशात काही जागा लढवू. आमचे प्रयत्न सुरू आहेत, असे संजय राऊत यांनी स्पष्ट केले.