शस्त्रास्त्र प्रशिक्षण; बजरंग दल नेत्यांवर गुन्हा

मटा ऑनलाइन वृत्त । अयोध्या

अन्य धर्माच्या नागरिकांपासून हिंदूंचं रक्षण करण्यासाठी कार्यकर्त्यांना शस्त्रास्त्रांचं प्रशिक्षण देणाऱ्या अयोध्येतील बजरंग दलाच्या नेत्यांवर गुन्हा दाखल करण्यात आला आहे. प्रशिक्षण शिबिरासाठी परवानगी न घेण्यात आल्याचं कारण पोलिसांनी दिलं आहे.

आक्रमक हिंदुत्ववादी संघटना म्हणून ओळखल्या जाणाऱ्या बजरंग दलानं दोन दिवसांपूर्वी अयोध्येत आपल्या कार्यकर्त्यांसाठी शस्त्रास्त्र प्रशिक्षण शिबीर घेतलं. शिबिरात प्रतिकात्मक शत्रू म्हणून उभ्या करण्यात आलेल्या लोकांच्या डोक्यावर मुस्लिम धर्मीयांची गोल टोपी होती. त्यावरून वाद निर्माण झाला होता. त्यानंतरही सुलतानपूर, गोरखपूर, पिलिभित, नोएडा व फतेहपूर येथे प्रशिक्षण शिबीर घेण्याचे ठरले होते. मात्र, त्याआधीच पोलिसांनी गुन्हा दाखल केला आहे. त्यामुळं पुढील शिबिरांवर प्रश्नचिन्ह लागलं आहे.

शिवसेनेचा पाठिंबा

बजरंग दलाच्या शस्त्र प्रशिक्षण शिबिराला शिवसेनेनं पाठिंबा दर्शविला असून त्या विरोधात गुन्हा दाखल केल्याबद्दल नाराजी व्यक्त केली आहे. 'देशात जैश-ए-मोहम्मद, लष्कर-ए-तोयबा यांसारख्या दहशतवादी संघटनांचे कॅम्प चालतात. त्यासाठी ते सरकारची परवानगी घेतात का? आपले लोक त्यांच्याविरुद्ध लढण्यासाठी हातात शस्त्रे घेत असतील तर त्यांच्यावर गुन्हा का दाखल करण्यात आला? हा केवळ निवडणुकीचा मुद्दा आहे. उत्तर प्रदेश सरकारने या प्रकरणी प्रत्येक पाऊल काळजीपूर्वक उचलावे,' असा इशारा शिवसेना नेते, खासदार संजय राऊत यांनी वृत्तसंस्थेशी बोलताना दिला.