अण्णांच्या आंदोलनात CM फडणवीसांवर बूटफेक

नवी दिल्ली:

ज्येष्ठ समाजसेवक अण्णा हजारे यांनी उपोषण मागं घ्यावं, यासाठी आज दिल्लीतील रामलीला मैदानात पोहोचलेले मुख्यमंत्री देवेंद्र फडणवीस यांच्यावर व्यासपीठाजवळ उपस्थित असलेल्या एका व्यक्तीनं बूट फेकल्याची घटना घडली. पोलिसांनी तात्काळ बूट फेकणाऱ्या व्यक्तीला ताब्यात घेतलं.

लोकपालसह विविध मागण्यांसह अण्णा हजारे दिल्लीतील रामलीला मैदानात २३ मार्चपासून उपोषणाला बसले होते. अण्णांनी उपोषण मागे घ्यावं, यासाठी सरकार प्रयत्नशील होते. मात्र, सहा दिवस उलटूनही अण्णा उपोषणावर ठाम होते. अखेर मुख्यमंत्री देवेंद्र फडणवीस हे अण्णांशी चर्चा करण्यासाठी रामलीला मैदानात पोहोचले. त्यांनी अण्णांशी चर्चाही केली. त्यानंतर ते व्यासपीठावर उपस्थितांना संबोधित करत होते. त्याचवेळी अण्णा समर्थक 'जय हिंद', 'वंदे मातरम्'च्या घोषणा देत होते. फडणवीस यांचं भाषण सुरू असतानाच गर्दीतून एका व्यक्तीनं फडणवीसांवर बूट भिरकावला. व्यासपीठावर उपस्थित असलेल्या कोणत्याही व्यक्तीला बूट लागला नाही. पोलिसांनी तात्काळ बूट फेकणाऱ्या व्यक्तीला ताब्यात घेतलं आणि तेथून घेऊन गेले. दरम्यान, बूट फेकणारी व्यक्ती नेमकी कोण होती, हे कळू शकलेलं नाही.