खुशखबर, यंदा पाऊस होणार समाधानकारक!

नवी दिल्ली : दुष्काळाचे चटके खाणाऱ्या शेतकऱ्यांसाठी यंदाचे वर्ष सुखाचे असणार आहे. कारण यंदा सामान्य पाऊसमान होणार असल्याचा अंदाज 'स्कायमेट' या खासगी वेधशाळेनं दिला आहे. जून ते सप्टेंबर दरम्यान सरासरीच्या ५५ टक्के पावसाचा अंदाजही वर्तवण्यात आला आहे.

जर मोसमी पाऊस दीर्घ कालावधी सरासरी (LPA) च्या ९६ ते १०४ टक्के असेल तर तो सामान्य असल्याचे म्हटले जाते. सरासरीहून ९० टक्क्यांहून कमी पाऊस तूटदर्शक तर ९० ते ९६ टक्के पाऊन सामान्यपेक्षा कमी असे ग्राह्य धरण्यात येते. सरासरीच्या १०४ ते ११० टक्के पाऊस सामान्यहून जास्त असतो. सरासरीच्या ११० पेक्षा अधिक टक्के पाऊस म्हणजे अतिवृष्टी असते.

अद्याप देशाचा पावसाचा अधिकृत अंदाज जाहीर व्हायचा आहे. पुढील आठवडाभरानंतर भारतीय हवामान विभागाकडून यंदाच्या नैऋत्य मोसमी पावसाचा अंदाज व्यक्त करण्यात येईल.

असा असेल प्रत्येक महिन्यानुसार पाऊस -

जून - सरासरीच्या ११ टक्के
जुलै - सरासरीच्या ९७ टक्के
ऑगस्ट - सरासरीच्या ९६ टक्के
सप्टेंबर - सरासरीच्या १०१ टक्के