...अन् बापानेच सैनिक मुलावर गोळी झाडली

मटा ऑनलाइन वृत्त। बेंगळुरू

सुट्टीसाठी घरी आलेल्या इरण्णा इंदी (वय २१) या जवानाला त्याच्याच वडिलांनी गोळी झाडून ठार केल्याची दुदैवी घटना सोमवारी घडली. आर्थिक कारणांवरुन वादावादी झाल्यामुळे इरण्णाची गोळी झाडून हत्या करण्यात आली. या घटनेत इरण्णाची आई आणि लहान बहिण जखमी झाली.

मद्रास इंजिनियरिंग ग्रुपमध्ये असलेला जवान इरण्णा सुट्टीनिमित्ताने बेळगाव जिल्ह्यातील नयानगर येथील आपल्या घरी आला होता. सोमवारी आर्थिक कारणावरुन इरण्णा आणि त्याचे वडिल विठ्ठल इंदी (वय ६१) यांच्यात वादावादी झाली. या वादावादीत इरण्णाच्या बाजूने त्याची आई आणि बहिण बोलत होते. मात्र, या भांडणात राग अनावर झाल्याने विठ्ठल इंदीने मुलावर बंदुकीतून तीन गोळ्या झाडल्या. या गोळीबारात इरण्णा ठार झाला तर त्याची आई आणि बहिण जखमी झाले. त्यांच्यावर बेळगाव जिल्हा रुग्णालयात उपचार सुरू आहेत. या प्रकरणी स्थानिक पोलीस ठाण्यात गुन्ह्याची नोंद करण्यात आली आहे.