मोबाइल काढून घेतल्यानं मुलानं केली वडिलांची हत्या

बेळगाव: वडिलांनी मोबाइल काढून घेतला म्हणून तरुण मुलानं वडिलांची हत्या केल्याची धक्कादायक घटना घडली आहे. सोमवारी पहाटे पाच वाजता सिद्धेश्वर नगर ,काकती इथं ही घटना घडली. रघुवीर कुंभार असं या तरुणाचं नाव आहे.

रात्री उशिरापर्यंत मोबाइलवर गेम खेळणाऱ्या मुलाला वडिलांनी झोप म्हणून सांगितलं. मुलगा सांगूनही ऐकत नसल्यानं त्यांनी मुलाचा मोबाइल काढून घेतला.त्यामुळं संतापलेल्या मुलानं आजूबाजूच्या घरावर दगडफेक करून खिडक्यांच्या काचा फोडल्या. शेजाऱ्यांनी पोलिसांना कळवल्यावर पोलिसांनी रघुवीर आणि पालकांना पोलीस स्टेशनमध्ये बोलवून समज दिली. रात्री घरी येऊन मग ते झोपले. मोबाइल घेतल्याचा राग डोक्यात ठेऊन रघुवीर झोपला होता. उठल्यानंतर त्यानं घरातील विळी घेऊन वडिलांची हत्या केली. हत्या केल्यावर त्यानं वडिलांचे हात, पाय आणि मान कापली.

माहिती मिळताच पोलिसांनी तत्काळ घटनास्थळी धाव घेत या तरुणाला ताब्यात घेतलं. पोलिसांनी अटक केल्यावर तरुणानं मला वडिलांच्या मृतदेहाचे आणखी तुकडे करायचे होते असं सांगितलं. वडिलांची हत्या करताना त्यानं आईला एका खोलीत कोंडून ठेवलं होतं.

अटक करण्यात आलेला हा तरुण तीन वेळा डिप्लोमा परीक्षेत नापास झाला होता. तो कोणतीही नोकरी देखील करत नव्हता. घरीच बसून होता. त्याच्या वडिलांचं नाव शंकर देवाप्पा कुंभार असं असून ते जिल्हा सशस्त्र दलात पोलीस अधिकारी होते. तीन महिन्यापूर्वीच ते सेवानिवृत्त झाले होते. काकती पोलीस स्थानकात सदर घटनेची नोंद झाली असून वरिष्ठ पोलीस अधिकाऱ्यांनी घटनास्थळी भेट दिली.