देशभरातील काँग्रेसजनांशी सोनियांचा आज संवाद

म. टा. विशेष प्रतिनिधी, नवी दिल्ली

महात्मा गांधी यांच्या दीडशेव्या जयंती समारंभाच्या कार्यक्रमाची रूपरेषा आखण्याच्या निमित्ताने काँग्रेस अध्यक्ष सोनिया गांधी आज, गुरुवारी अ. भा. काँग्रेसचे सरचिटणीस, राज्य प्रभारी, सचिव, प्रदेशाध्यक्ष, विधिमंडळ नेते, फ्रंटल संघटनांच्या अध्यक्षांशी चर्चा करणार आहे. काँग्रेस पक्ष संघटनेची पुनर्बांधणी करण्याबरोबरच सत्तेतील १०० दिवस पूर्ण करणाऱ्या मोदी सरकारच्या जाचक धोरणांविरुद्ध रस्त्यावर उतरुन संघर्ष करण्याविषयी या बैठकीत रणनीती आखली जाण्याची शक्यता आहे.

येत्या २ ऑक्टोबर रोजी महात्मा गांधी यांची दीडशेवी जयंती साजरी करण्यात येत असून त्यानिमित्ताने काँग्रेस पक्षातर्फे आयोजित करण्यात येणाऱ्या देशव्यापी कार्यक्रमांची रूपरेषा या बैठकीत आखण्यात येईल. यानिमित्ताने सोनिया गांधी यांनी काँग्रेस पक्षाचा विविध राज्यांतील संघटनात्मक स्थितीचा आढावा घेण्याचे ठरविले आहे. सर्व राज्यांमधील काँग्रेसची अवस्था कशी आहे आणि संघटनेत जान फुंकण्याच्या दृष्टीने कोणती उपाययोजना करावी लागेल, याविषयी देशभरातून आलेल्या पदाधिकाऱ्यांची मते सोनिया गांधी जाणून घेतील. केंद्रात दुसऱ्यांदा सत्तेत आलेल्या मोदी सरकारचे १०० दिवस पूर्ण झाले असून सरकारच्या जनविरोधी धोरणांविरुद्ध रस्त्यावर उतरून संघर्ष करण्याची वेळ आली आहे, असे काँग्रेसजनांना वाटत आहे. त्यासाठी आक्रमक रणनीतीचा अवलंब करण्यावर या बैठकीत भर देण्यात येईल. महाराष्ट्र, हरयाणा आणि झारखंड या तीन राज्यांतील विधानसभा निवडणुकींच्या तोंडावर काँग्रेसला गळती लागली असून ती रोखण्याचे तसेच काँग्रेसमध्ये नव्या रक्ताच्या नेत्यांना संधी देण्याचे आव्हान सोनिया गांधींपुढे आहे. काँग्रेसला पुनरुज्जीवित करण्यासाठी बूथ, ब्लॉक, जिल्हा आणि राज्यस्तरावर प्रशिक्षण कार्यक्रम सुरू करण्याची योजनाही आखण्यात आली आहे.