लहानग्यांच्या लैंगिक शोषणाविरोधात ई-ड्रॉपबॉक्स

मटा ऑनलाइन वृत्त । नवी दिल्ली

मुलांवर होणाऱ्या लैंगिक शोषणाविरुद्ध तक्रार करण्यासाठी लवकरच ई-ड्रापबॉक्सची सुविधा सुरू केली जाणार आहे. ई-ड्रॉपबॉक्सवर असलेल्या सोप्या भाषेचा वापर करून, तसेच चित्रांच्या व चिन्हांच्या माध्यमातून प्रत्येक मुलाला त्याचा सहजपणे तक्रार करता येणार आहे.

केंद्रीय महिला व बालकल्याण मंत्रालयानं ही सुविधा सुरू करण्याच्या दिशेनं काम सुरू केलं आहे. शाळा, खासगी शिकवण्या, स्कूल बस तसंच किंवा घरातही लहान मुलांचे लैंगिक शोषण होत असल्याच्या घटना अनेकदा निदर्शनास आल्या आहेत. मात्र, अशा ठिकाणी होणाऱ्या लैंगिक शोषणाविरोधात तक्रार करायला मुले घाबरतात. हे लक्षात घेऊन सरकारनं हे पाऊल आहे. ई-ड्रॉपबॉक्स म्हणजे मुलांभोवती सुरक्षेची एक लक्ष्मणरेषाच असेल, असे केंद्रीय मंत्री मनेका गांधी यांनी सांगितले. राष्ट्रीय बाल हक्क सुरक्षा आयोगाकडून ई-ड्रॉपबॉक्सची ही सुविधा दिली जाईल. यावरील चित्रे आणि चिन्हांची रचना आयोगाकडून तयार करण्यात आली आहे.

‘निर्भिक’च्या यशानंतर...

दिल्ली पोलिसांनी लहान मुलांच्या लैंगिक शोषणाविरोधात 'ऑपरेशन निर्भिक' ही मोहीम सुरू केली होती. दिल्ली पोलिसांनी घर, शाळा आदी ठिकाणी तक्रारपेटी ठेवली होती. यात कोणत्याही मुलांना अत्याचाराविरोधात तक्रार करण्याची सुविधा होती. या माध्यमातून मुलांच्या अनेक तक्रारी आल्या. त्यानुसार पुढे पोलिसांनी गुन्हे दाखल केले. या मोहिमेला मिळालेल्या यशानंतर महिला आणि बालकल्याण आयोगानं ही योजना संपूर्ण देशात राबवण्याचं ठरवलं आहे.

देशात ५३% मुलांवर लैंगिक अत्याचार

सरकारने २००७मध्ये जाहीर केलेल्या अहवालानुसार, देशातील ५३ टक्के मुलांवर लैंगिक अत्याचार होतात. विशेष म्हणजे यापैकी एकाही घटनेची नोंद पोलीस ठाण्यात होत नाही. आंध्र प्रदेश, बिहार, आसाम आणि दिल्ली या राज्यात मुलांवर सर्वाधिक लैंगिक अत्याचार होतात. धक्कादायक म्हणजे मुलांवर होणाऱ्या ५० टक्के लैंगिक अत्याचाराच्या घटना विश्वासू लोकांकडूनच केल्या जातात, असंही अहवालात नमूद करण्यात आलं होतं.