मला 'आयटम गर्ल' बनवून ठेवलंय: आझम खान

मटा ऑनलाइन वृत्त । नवी दिल्ली

भारतीय जवानांना 'बलात्कारी' असं संबोधून वाद ओढवून घेणारे समाजवादी पक्षाचे नेते आझम खान यांनी आता घूमजाव केलं आहे. 'मी सैन्यावर कोणतेही आरोप केले नाहीत. माझ्या वक्तव्याचा चुकीचा अर्थ लावण्यात आलाय,' असं सांगत, 'फॅसिस्ट शक्तींनी मला 'आयटम गर्ल' बनवून ठेवलं आहे', अशी सारवासारव त्यांनी केली आहे.

रामपूरमधील एका कार्यक्रमादरम्यान बोलताना त्यांनी सुकमा हल्ल्यातील जवानांवर बलात्काराचा आरोप केला होता. या भाषणाचा व्हिडिओ व्हायरल झाल्यामुळं वादंग उठलं होतं. आझम खान यावर खुलासा करताना म्हणाले की, 'माझ्या विधानाचा गैर अर्थ काढला जात आहे. मी फॅसिस्ट शक्तींची आयटम गर्ल बनलो आहे. भाजपासाठी मी केवळ तिरस्काराचा अजेंडा आहे. माझ्याविरुद्ध तिरस्कार पसरवून भाजपला मतं मिळतात. माझ्यावर प्रेम करा, तिरस्कार करू नका. मी मुलांना शिकवतो. खासगी विद्यापीठ चालवतो. मी मेडिकल कॉलेज काढलं आहे. लहान घरात राहतो. मी तेवढंच बोललो, जे वृत्तपत्रात छापून आलं आणि वृत्तवाहिन्यांवर दाखवलं.'

काय म्हणाले होते आझम खान...

'दहशतवादी लष्करातील जवानांची गुप्तांगं कापून घेऊन गेले. त्यांनी असं का केलं, याचा विचार व्हायला हवा. त्यांना जवानांचे हात नको होते. मुंडकी नको होती आणि पायाशीही काही घेणंदेणं नव्हतं. शरीराच्या ज्या अवयवाबद्दल त्यांना तक्रार होती, तोच अवयव ते घेऊन गेले. होते. हे कृत्य करून दहशतवाद्यांनी एक मेसेज दिला आहे. संपूर्ण देशाला याची लाज वाटली पाहिजे,' असं आझम खान म्हणाले होते.