गहू-तांदुळापासून लॅपटॉप-मेट्रोपर्यंत सबकुछ!

मटा ऑनलाइन वृत्त । लखनऊ

उत्तर प्रदेश विधानसभा निवडणुकीसाठी आज सकाळीच काँग्रेसशी हातमिळवणी केल्यानंतर समाजवादी पार्टीचे नेते आणि उत्तर प्रदेशचे मुख्यमंत्री अखिलेश यादव यांनी आपला जाहीरनामा प्रकाशित केला. त्यात गरिबांना गहू-तांदूळ-कुकर मोफत देण्यापासून ते विद्यार्थ्यांना लॅपटॉप-स्मार्टफोन वाटण्यापर्यंत आणि किसान कोषापासून ते आग्रा-कानपूर-काशीमध्ये मेट्रो सुरू करण्यापर्यंत अनेक आश्वासनांची 'सपा'सप खैरात वाटण्यात आली आहे.

तीन वर्षांत 'अच्छे दिन' दिसले नाहीत, विकासही झाला नाही. उलट, विकासाच्या नावाने हातात झाडू देण्यात आला आणि योगासनं करायला लावली गेली. याउलट समाजवादी सरकारनं सगळ्यांना सोबत घेऊन सगळ्यांचा विकास केला आहे, अशा शब्दांत अखिलेश यादव यांनी पंतप्रधान नरेंद्र मोदींना लक्ष्य केलं. आपले हितचिंतक कोण आहे, हे गरीब शेतकरी आणि अल्पसंख्याकांना नेमकं ठाऊक असल्याचं सांगत त्यांनी सरकार स्थापनेचा विश्वास व्यक्त केला. मूर्तीवाल्यांचं सरकार आल्यास ते जनेश्वर मिश्र यांच्यापेक्षा मोठा हत्ती लावत बसतील, असा टोला त्यांनी मायावतींना लगावला.

दरम्यान, समाजवादी पार्टीच्या जाहीरनाम्यावर अखिलेश आणि मुलायमसिंह यादव यांचा फोटो झळकत असला तरी, जाहीरनामा प्रकाशन सोहळ्याकडे मुलायम यांनी पाठ फिरवली. बराच वेळ त्यांची वाट पाहिल्यानंतर, आझम खान त्यांना आणण्यासाठी त्यांच्या घरी गेले.

सपाची 'सपासप' आश्वासनं अशीः

>> एक कोटी लोकांना दरमहा हजार रुपये पेन्शन
>> गरीब महिलांना मोफत प्रेशर कुकर
>> हुशार विद्यार्थ्यांना लॅपटॉपसोबतच स्मार्टफोन
>> अल्पसंख्याकांसाठी कौशल्य विकास योजना
>> मजुरांना सवलतीच्या दरात मध्यान्ह भोजन
>> ज्येष्ठ नागरिकांसाठी वृद्धाश्रम
>> जनावरांवरील उपचारांसाठी अॅम्ब्युलन्स सुविधा
>> कुपोषित बालकांना एक किलो तूप, एक किलो दूध पावडर
>> शहराप्रमाणेच गावांतही २४ तास वीज
>> समाजवादी किसान कोष तयार करणार
>> एसटी प्रवासात महिलांना अर्धे भाडे
>> जिल्हा मुख्यालय चौपदरी रस्त्याने जोडणार
>> नव्या उद्योजकांसाठी स्टार्ट-अप योजना