उत्तराखंडच्या १३ जिल्ह्यांतील जंगलात आग

मटा ऑनलाइन वृत्त । डेहराडून

उत्तराखंडच्या १३ जिल्ह्यांतील जंगलात आग लागली आहे. या आगीत ६ जणांचा होरपळून मृत्यू झाला आहे. आग विझवण्यासाठी राज्याचे अग्निशमन दल, वन विभाग आणि एनडीआरएफ (राष्ट्रीय आपत्ती निवारण विभाग) संयुक्तपणे काम करत आहेत. राज्यात हायअलर्ट देण्यात आला आहे. राज्याच्या वन विभाग आणि अग्निशमन दलाच्या सर्व अधिकारी आणि कर्मचाऱ्यांच्या सुट्या रद्द करण्यात आल्या आहेत.

आगीचे स्वरुप पाहून एनडीआरएफच्या अतिरिक्त पथकांना बोलावण्यात आले आहे. आतापर्यंत उत्तराखंडचे १८९०.९२ हेक्टर जंगल जळून खाक झाले आहे. राज्याच्या वनसंपत्तीचे अफाट नुकसान झाले आहे. गढवाल आणि कुमाउं जिल्ह्यात आगीची तीव्रता जास्त आहे. तिथे आग विझवण्यासाठी एनडीआरएफच्या सर्वाधिक अनुभवी सदस्यांची नियुक्ती करण्यात आली आहे. जिल्हा प्रशासन, वन विभाग, एनडीआरएफ आणि अग्निशमन दल यांच्यात समन्वय राखण्यासाठी प्रत्येक जिल्ह्यात विशेष व्यवस्था करण्यात आली आहे.

यंदा फेब्रुवारी पासून आतापर्यंत उत्तराखंडच्या जंगलांमध्ये आग लागण्याच्या ९२२ घटना घडल्या आहेत. उन्हाळ्यामुळे वणवा पेटून आग लागण्याच्या घटना उत्तराखंडमध्ये दरवर्षीच होतात. मात्र यंदा १३ जिल्ह्यांमध्ये खूपच मोठ्या प्रमाणावर जंगलात आग भडकली असल्याचे मुख्य सचिव शत्रुघ्न सिन्हा आणि वनाग्नी नोडल अधिकारी बी. पी. गुप्ता यांनी सांगितले. उत्तराखंडच्या वन विभागाच्या वेबसाइटवर आगीमुळे झालेल्या हानीबाबत सविस्तर माहिती दिली जात आहेत, असेही मुख्य सचिव सिन्हा यांनी सांगितले.