बेंगळुरू मेट्रोचे 'शटर डाऊन', प्रवाशांचे हाल

मटा ऑनलाइन वृत्त । बेंगळुरू

बेंगळुरू मेट्रोने प्रवास करणाऱ्या हजारो प्रवाशांचे शुक्रवारी हाल झाले. मेट्रो कर्मचाऱ्याला मारहाण केल्याच्या निषेधार्थ ही सेवा बंद करून कर्मचाऱ्यांनी निदर्शने केली. त्यामुळे मेट्रोने विविध मार्गांवरून प्रवास करणाऱ्या प्रवाशांना कार्यालय वा इच्छित स्थळी पोहोचता आले नाही.

बेंगळूरू मेट्रो रेल कॉर्पोरेशन लि. कंपनीचे प्रमुख पब्लिक रिलेशन्स ऑफिसर यु. ए. वसंत राव म्हणाले, 'मेट्रो कर्मचारी आणि कर्नाटक स्टेट इंडस्ट्रीअल सिक्युरिटी पर्सोनेल यांच्यात गुरुवारी बाचाबाची झाली. यानंतर मेट्रो कर्मचाऱ्यांपैकी काहींना अटक झाली. परिणामी कर्मचारी आपल्या या सहकाऱ्यांच्या सुटकेच्या मागणीसाठी आंदोलन करत आहेत. आम्ही यातून तोडगा काढण्चाचा प्रयत्न करत आहोत.'

बायपनहळ्ळी, नागसारडा, मयूर रोड आणि येलचेनहळ्ळी या मार्गावरून सकाळी ठीक ५ वाजता गाड्या सुरू होतात. पण आज मात्र कर्मचाऱ्यांनी मेट्रो रेल्वे स्थानकावरचे शटरच बंद केले आहे. नम्मा मेट्रोचे जाळे शहरात सुमारे ४२ किमी पसरलेले आहे. या मेट्रोवर सुमारे ३ लाख प्रवासी अवलंबून आहेत.