गुजरातमध्ये गाढवांचे मालक संपावर

बडोदा: पशू क्रुरता निवारण अधिनियमातील नव्या तरतुदींना विरोध म्हणून पावागडमधील गाढवांच्या मालकांनी संप पुकारला आहे. त्यामुळे येथील डोंगराळ भागात जीवनावश्यक वस्तूंची वाहतूक थांबली असून त्याचा सर्वसामान्यांना फटका बसत आहे.

पावागडचा संपूर्ण परिसर डोंगराळ आहे. या भागात चांगले रस्ते नाहीत. त्यामुळे गाढवांवरच सामना लादून नेले जाते. त्यात जीवनावश्यक वस्तूंपासून अनेक वस्तूंचा समावेश असतो. मात्र नव्या नियमानुसार गाढवांवरून ५० किलोपेक्षा अधिक सामान वाहून नेण्यास मज्जाव करण्यात आला आहे. त्यामुळे गाढवांच्या मालकांमध्ये रोष निर्माण झाला आहे. या नियमामुळे सामान वाहून नेण्यासाठी अनेक फेऱ्या माराव्या लागतील. त्याचा उत्पन्नावर परिणाम होऊन घर खर्चही भागणार नसल्याचं या मालकांचं म्हणणं आहे.


५० किलो सामान वाहून नेण्यासाठी आम्हाला मिळणारं भाडं पुरेसं नाही. आम्ही अधिक सामान वाहून नेल्यास आमच्यावर गुन्हे दाखल केले जाणार आहे. त्याविरोधात आम्ही संप पुकारला असून हा संप मागे घेतला जाणार नाही, असं गाढवांच्या मालकांपैकी एक संजय राणा यांनी सांगितलं. दरम्यान, लवकरच हा संप मिटेल, असा दावा जिल्हा प्रशासनाने केला आहे. गाढवांच्या मालकांच्या प्रश्नांवर तोडगा काढण्यात येणार असल्याचं जिल्हा प्रशासनाने म्हटलं आहे. पावागडमध्ये २५० दुकाने असून गाढवांची संख्या ३३५ एवढी आहे.