Video : सारखी भुंकते म्हणून कुत्रीला बेदम मारहाण, शेडमध्ये नेऊन संपवलं; ४ विद्यार्थ्यांच्या कृत्यानं संताप

नवी दिल्ली : क्रिकेट खेळत असताना एक गर्भवती कुत्री सतत मैदानावर भुंकत असल्याने त्रस्त झालेल्या इंजिनीअरिंगच्या चार विद्यार्थ्यांनी बेदम मारहाण करून त्या कुत्रीचा जीव घेतला. धक्कादायक म्हणजे, एका टीनशेडमध्ये लाकडी दांडा व स्टंपने अमानुष मारहाण करण्यात आली. तिथे उपस्थित असलेले काही तरुण 'कुत्रीला मारून टाक' असं म्हणत असल्याचं व्हिडिओ ऐकू येत आहे. याचा व्हिडिओही व्हायरल झाला आहे.

पोलिसांनी दिलेल्या माहितीनुसार, नवी दिल्लीतील न्यू फ्रेंड्स कॉलनीत ही घटना घडली. पोलिसांनी ४ विद्यार्थ्यांना अटकही केली आहे. कुत्रीला ठार करण्याची घटना ३० ऑक्टोबर रोजी घडली. मारून टाकण्यात आलेली कुत्री नेहमी याच भागात फिरत होती.


गिरीश महाजनांच्या 'त्या' वक्तव्यानंतर नाथाभाऊंच्या घरी ७० फोन, कुटुंबाच्या जखमेवरची खपली निघाली
थरकाप उडवणाऱ्या या घटनेचा व्हिडिओ व्हायरल झाल्यानंतर एका महिलेने शनिवारी १९ नोव्हेबरला पोलिसांत तक्रार दिली. न्यू फ्रेंड्स कॉलनीत त्या कुत्रीला मारून टाकण्यात आल्याचं तक्रारीत म्हटलं आहे. पोलिसांनी या प्रकरणाचा तपास सुरू करत चार आरोपी तरुणांना अटक केली. पोलिसांनी दिलेल्या माहितीनुसार, चारही विद्यार्थी हे डॉन बॉस्को टेक्निकल इन्स्टिट्युटचे विद्यार्थी आहेत. घटना घडली तेव्हा तयार करण्यात आलेल्या व्हिडिओत १० ते २० लोक दिसत आहेत. हे लोकं टीन शेडमध्ये कुत्रीला मारहाण करत आहेत. यातील काहीजण तर 'मारा, मारा' असे ओरडत असल्याचे ऐकू येते.

वरिष्ठ पोलीस अधिकाऱ्यांनी दिलेल्या माहितीनुसार, सर्वात आधी व्हिडिओ फुटेजची तपासणी करण्यात आली. यात मारहाण करणाऱ्या चार आरोपींची ओळख पटली असून, त्यांच्या मुसक्या आवळण्यात आल्या. आग्नेय विभागाच्या पोलीस उपायुक्त ईशा पांडे म्हणाल्या की, या प्रकरणात तक्रार दाखल झाल्यानंतर पोलिसांनी आरोपींचा शोध सुरु केला. पोलीस डॉन बास्को टेक्निकल इन्स्टिट्युटमध्ये जाऊन आले. परंतु सुट्या असल्याने तिथे कुणी सापडले नाही. त्यानंतर पोलिसांनी संचालकांशी संपर्क साधून घटनेचे गांभीर्य समजावून सांगितले.


पण त्याचवेळी एका व्यक्ती समोर येत तक्रार दिली. मारहाण करणाऱ्या अविनाश मिंज असल्याचं सांगितलं. महाविद्यालयातून याची सर्व माहिती काढून पोलिसांची टीम त्याच्या घरी गेली. पण तो तिथे नव्हता व मोबाईल फोनही स्वीच ऑफ होता. पण नंतर पोलिसांनी त्याला अटक केली. त्याने गुन्हा कबूल केला. त्याने दिलेल्या माहितीवरुन कुत्रीचे मृत शरीर सापडले. अविनाशसोबत असलेल्या अनीस होरहोरिया, राहुल कुजूर आणि गुरुवचन यांनाही अटक करण्यात आली आहे.