विद्यार्थ्यांना शिक्षा; पाजला कडूनिंबाचा रस

Melvyn.reggiethomas@timesgroup.com

टाइम्स न्यूज नेटवर्क । सूरत

शाळेत खोड्या करणाऱ्या मुलांना एरवी उठाबशा, बेंचवर उभं राहणं, मैदानात धावणं किंवा शाळेच्या परिसराची साफसफाई करणे अशा प्रकारची शिक्षा दिली जाते. पण हिऱ्यांना पैलू पाडणाऱ्या सूरत शहरातील एका शाळेत मात्र खोडकर विद्यार्थ्यांना शिक्षा म्हणून कडूनिंबाचा रस पाजला जातो.

विद्या कुंज स्कूलमध्ये विद्यार्थ्यांना शिक्षा म्हणून एक कप कडूनिंबाचा रस पिण्यासाठी दिला जातो. शाळेच्या प्राचार्यांनी मात्र या शिक्षेबद्दल खूपच 'हेल्दी' स्पष्टीकरण दिलं आहे. कडूनिंबाचा रस पिणं हे आरोग्यासाठी लाभदायक आहे, असं शाळेचे प्राचार्य महेश पटेल यांचं म्हणणं आहे. ही कठोर शिक्षा नाही; पण 'कडू' आहे. ज्या विद्यार्थ्यांना कडू आवडत नाही, असे विद्यार्थी भविष्यात वाईट वर्तणूक करणार नाहीत. प्राथमिक आणि हायस्कूलच्या विद्यार्थ्यांनाच ही शिक्षा केली जाते. मागील वीस दिवसांपासून अशी 'कडू' शिक्षा देण्यास सुरुवात केली आहे. रसातील कडूपणा काही प्रमाणात कमी करण्यासाठी कपामध्ये थोडं पाणी मिसळलं जातं, असंही त्यांनी सांगितलं.

माणसाच्या आरोग्यासाठी कडूनिंबाचा रस उत्तम असून ते रोगप्रतिकारक आहे. कॅन्सरसारख्या महाभयंकर आजारावरही ते गुणकारी आहे. मीही दररोज न चुकता रस पितो. त्यामुळं माझ्या विद्यार्थ्यांना ही 'आरोग्यदायी' शिक्षा द्यावी, असं माझ्या मनात आलं, असं पटेल यांनी सांगितलं.

>> 'आता 'झटपट' होमवर्क

सहावीत शिकणारा माझा मुलगा सागर यानं शाळेत शिक्षा म्हणून कडुनिंबाचा रस पाजल्याचं सांगितलं. त्याच्या दुसऱ्याच दिवशी मी शाळेत गेले. तेथील दृश्य पाहून मला आश्चर्याचा धक्काच बसला. शाळेत दररोज कडूनिंबाचा रस बनवला जातो आणि वर्गात खोड्या करणाऱ्या विद्यार्थ्यांना शिक्षा म्हणून तो पाजला जातो. माझ्या मुलाला कडू रस प्यायला आवडत नाही. त्यामुळं आता तो शिक्षकांनी दिलेला अभ्यास वेळच्या वेळी पूर्ण करतो, असं सागरची आई दिव्या शाह यांनी सांगितलं.