संघ बंडखोरांचे श‌क्तिप्रदर्शन

शेवटच्या श्वासापर्यंत स्वयंसेवकचः सुभाष वेलिंगकर यांचा नारा

वृत्तसंस्था, पणजी

गोव्यात कोकणी भाषेचा मुद्दा बळकट करून सत्ताधारी भाजप सरकार आणि राष्ट्रीय स्वयंसेवक संघाविरोधात बंडाचे निशाण फडकवणारे सुभाष वेलिंगकर यांनी रविवारी येथे जोरदार शक्तिप्रदर्शन केले. ‘कोकणी भाषा आणि गोव्याची मूळ संस्कृती यांच्याशी तडजोड केली जाणार नाही’, असे स्पष्ट करत, ‘आम्ही आमच्या शेवटच्या श्वासापर्यंत स्वयंसेवकच राहू’, असा नाराही त्यांनी सुमारे दोन हजार समर्थकांपुढे बोलताना दिला.

‘भाजपने ‌इंग्रजी भाषेचे लांगुलचालन चालवले आहे. मात्र, भाजपची ही भूमिका मान्य करणारा एकही स्वयंसेवक सापडणार नाही, एकवेळ सरसंघचालक चुकतील पण, संघ चुकणार नाही, असे संघाचे संस्थापक केशव हेडगेवार एकदा बोलले होते’, असे सांगत ‘आरएसएस गोवा प्रांत’ ही पर्यायी संघटना स्थापण्याच्या आपल्या निर्णयाचे वेलिंगकर यांनी यावेळी समर्थन केले.

कोकणी भाषेच्या मुद्द्यावरून आक्रमक झाल्यानंतर संघाने वेलिंगकर यांना गो‍‍व्यातील संघनेतृत्वाच्या जबाबदारीतून मुक्त केले होते. नवे गोवा विभाग संघचालक म्हणून संघाने शनिवारीच लक्ष्मण बेहरे यांची नियुक्ती करून बंडखोरांपुढे झुकणार नाही, असे संकेत दिले होते. त्यानंतर आधी ठरल्याप्रमाणे वेलिंगकर यांनी समर्थकांसह सभा घेऊन रविवारी शक्तिप्रदर्शन केले.

पर्रीकर-वेलिंगकर भेट

कोकणी भाषेच्या मुद्दयावरून भाजप आणि भाजपचे ज्येष्ठ नेते मनोहर पर्रीकर यांच्याशी वेलिंगकर यांनी संघर्षाची भूमिका घेतली असतानाही पर्रीकर यांनी वेलिंगकर यांच्या घरी जाऊन गणपतीचे दर्शन घेतले. गणेश चतुर्थीत नेहमीप्रमाणे होणारी ही भेट होती आणि त्यावेळी भाषावादाचा कुठलाही मुद्दा चर्चेला आला नाही.