स्वामी यांचा थेट मोदींवर निशाणा

जीडीपीची आकडेवारी जाहीर केली तर खळबळ उडेल

नवी दिल्लीः प्रमुख विषयांवर शेलकी मते प्रदर्शित करण्याची डॉ. सुब्रह्मण्यम स्वामी यांची भूमिका कायम असून, आता ते ‘अच्छे दिन’ या पंतप्रधान नरेंद्र मोदी यांच्या घोषणेवर घसरले आहेत. देशांतर्गत उत्पन्नाची (जीडीपी) खरी आकडेवारी जाहीर केली, तर खळबळ माजेल, असे धक्कादायक विधान त्यांनी केले आहे.

स्वामी यांच्या वक्तव्यांविषयी पंतप्रधान नरेंद्र मोदी यांनी अप्रत्यक्षपणे नाराजी दर्शविली असली, तरी त्याकडे सरळसरळ दुर्लक्ष करून मोदी यांच्या ‘अच्छे दिन’ या घोषणेवर टीका करून जीडीपीची खरी आकडेवारी जाहीर केली, तर खळबळ उडेल, असे त्यांनी म्हटले आहे. त्यांनी ट्विटरवर लिहिलेल्या संदेशात म्हटले आहे, की आपण जीडीपीची खरी आकडेवारी जाहीर केली, तर पक्षाला ते मान्य होणार नाही आणि ही पक्षविरोधी कारवाई समजली जाईल.

स्वामींची ट्विटर ‘विश्रांती’

दरम्यान, जूनमध्ये ट्विटरद्वारे मोदी सरकारचे नोकरशहा व केंद्रीय अर्थमंत्री अरुण जेटली यांच्यावर प्रत्यक्ष-अप्रत्यक्ष टीकेचा भडीमार करीत भरपूर धुमाकूळ घालणारे भाजपचे राज्यसभेचे सदस्य सुब्रमण्यम स्वामी यांनी आता काही काळ ट्विटर विश्रांती घेण्याची घोषणा केली आहे. त्यामुळे केंद्र सरकार आणि भाजपला उसंत मिळणार आहे.