रघुराम राजनना पुन्हा शिकागोला पाठवा!- स्वामी

मटा ऑनलाइन वृत्त । नवी दिल्ली

धाडसी निर्णय आणि करारी बाण्यासाठी ओळखले जाणारे रिझर्व्ह बँकेचे गव्हर्नर रघुराम राजन यांना पदावरून हटवण्याची मागणी करून आज राज्यसभा खासदार सुब्रमण्यम स्वामींनी अनेकांना आश्चर्याचा धक्का दिला आहे. राजन यांची धोरणं, अर्थनीती भारतासाठी अनुकूल नाही, त्यांना पुन्हा शिकागोला प्राध्यापकी करायला पाठवायला हवं, अशी टिप्पणी त्यांनी केली आहे.

चलन फुगवटा कमी करण्यासाठी व्याजदर वाढवण्याच्या रघुराम राजन यांच्या निर्णयामुळे देशाचं मोठं नुकसान झाल्याचं मत स्वामींनी मांडलं. व्याजदर वाढवल्यानं बेकारी वाढली, महागाई वाढली आणि देशाचा जीडीपी दर घटल्याचं निरीक्षण त्यांनी नोंदवलं. देशाला राजन यांच्या धोरणांची गरज नाही, त्यांना पुन्हा शिकागो विद्यापीठात पाठवून द्यावं, असा टोलाही स्वामींनी हाणला.

अर्थात, रघुराम राजन यांना पदावरून हटवण्याची मागणी याआधीही झाली आहे. त्यांचा कार्यकाळ सप्टेंबरमध्ये संपतोय.