‘आधार' नसले तरी सर्व लाभ मिळणार!

नवी दिल्ली : आधार कार्ड नाही, म्हणून कोणालाही कोणत्याही लाभापासून वंचित ठेवण्यात येणार नाही, असे केंद्रीय माहिती आणि प्रसारणमंत्री व्यंकय्या नायडू यांनी शुक्रवारी राज्यसभेत स्पष्ट केले.

आधार कार्डाच्या सक्तीबाबत संसद सदस्यांनी व्यक्त केलेल्या चिंतेची दखल घेऊन त्यांनी हे स्पष्टीकरण दिले. ‘ज्यांच्याकडे आधार कार्ड नसेल, अशांच्या ओळखीसाठी त्यांची स्वतंत्रपणे नोंदणी करून त्यांना अनुदान किंवा एखाद्या सरकारी सेवेचा लाभ दिला जाईल, असे आधार कायद्याच्या कलम सातमध्ये नमूद केले आहे. त्यामुळे कोणत्याही लायक लाभधारकाला लाभापासून वंचित ठेवले जाणार नाही,’ असे नायडू यांनी सांगितले. आतापर्यंत १०३ कोटी नागरिकांनी आधार कार्ड काढले असल्याची माहितीही त्यांनी दिली.