सुदर्शन यांनी साकारला वाळुचा सर्वात उंच किल्ला!

मटा ऑनलाइन वृत्त । भुवनेश्र्वर

जागतिक किर्तीचे प्रसिद्ध वाळुशिल्पकार सुदर्शन पटनायक यांना मिळालेल्या सन्मानांमध्ये आणखी एक मानाचा तुरा खोवला गेला आहे. त्यांनी बनवलेल्या वाळूच्या भव्य किल्ल्याची नोंद गिनीज बुकने घेतली आहे. हा किल्ला जगातला वाळुचा सर्वात उंच किल्ला आहे.

पुरी येथील समुद्रकिनाऱ्यावर हा किल्ला सुदर्शन आणि त्यांच्या टीमने साकारला आहे. सुदर्शन यांनी अमेरिकन शिल्पकाराचा विक्रम मोडित काढला आहे. अमेरिकन शिल्पकार टेड सिबर्ट यांनी सात दिवसात वाळूचा किल्ला बनवला होता, तर सुदर्शन यांनी चारच दिवसात हे काम पूर्ण केले आहे. सुदर्शन यांच्यासोबत त्यांची ४५ विद्यार्थ्यांची टीम या कलाकृतीसाठी अथक परिश्रम घेत होती. 'गेले चार दिवस आम्ही दररोज १२ तास काम केले. गिनीज बुक ऑफ वर्ल्ड रेकॉर्ड्सच्या टीमला हे शिल्प पाहण्यासाठी आणि मोजमाप करण्यासाठी एक तास लागला. त्यानंतर त्यांनी विश्वविक्रमाची घोषणा केली,' सुदर्शन पटनायक टाइम्स ऑफ इंडियाला म्हणाले.

राज्याचे पर्यटन विभागाचे संचालक नितीन जावळे यावेळी उपस्थित होते. त्यांनी माहिती दिली की, 'आधीचा विक्रम अमेरिकन वाळुशिल्पकार टेड सिबर्ट यांच्या नावावर आहे. त्यांनी २०१५ साली मियामी बीचवर१३.९७ मीटर उंचीचा (४५ फूट) किल्ला बनवला होता. सुदर्शन यांनी हा विक्रम मोडत १४.४८ मीटर उंचीचा (४८.८ फूट) किल्ला बनवा. हे शिल्प आणखी दोन दिवस नागरिकांना पाहण्यासाठी उपलब्ध असेल.'

यापूर्वी पटनायक यांच्या नावावर लिम्का बुक ऑफ रेकॉर्डचे २३ विश्वविक्रम आहेत. ते दरवर्षी विविध संकल्पनांवर वाळुशिल्पे साकारत स्वत:चेच विक्रमही मोडित काढतात.