जेवतानाच केलं जवानांना लक्ष्य

मटा ऑनलाइन वृत्त । नवी दिल्ली

सुकमा जिल्ह्यातील दहशतवादी हल्ल्यात सीआरपीएफच्या २५ जवानांना हौतात्म्य पत्करावं लागल्याने सर्वत्र संतापाची लाट उसळली असतानाच हे जवान जेवत असतानाच त्यांच्यावर हल्ला चढवण्यात आल्याची धक्कादायक बाब समोर आली आहे.

चिंतागुफा आणि बुर्कापाल यांना जोडणाऱ्या ५.५ किलोमीटर लांबीच्या रस्त्याचं बांधकाम सध्या सुरू असून एकूण ९९ जवानांचा समावेश असलेली तीन पथकं या रस्त्याच्या सुरक्षेसाठी गस्त घालत होती. दरम्यान, यापैकी ३६ जवानांचं एक पथक झाडाखाली जेवण घेत असतानाच त्यांना लक्ष्य करण्यात आलं. नक्षलवाद्यांनी अंदाधुंद गोळीबार करत ग्रेनेडही फेकले.

नक्षलवाद्यांना स्थानिक गावकऱ्यांची साथ होती. त्यांच्यामार्फत ते जवानांच्या हालचालींवर लक्ष ठेऊन होते. त्यामुळेच जेवणाची वेळ साधून त्यांनी जवानांना लक्ष्य केलं, असं एका अधिकाऱ्याने सांगितलं. बहुतेक जवानांचं जेवण झालं होतं तर काहीजण जेवत होते. किमान पाचेक मिनिटांत हे जवान पुन्हा सज्ज होणार होते आणि त्याचवेळी हल्ला झाला असे एक अधिकारी म्हणाला.

एके सीरिजच्या १३ रायफल्स आणि ५ इन्सास रायफल्ससह ३ हजार ४२० राउंड्स, एके रायफल्सच्या ७५ मॅगझिन्स, इन्सासच्या ३१ मॅगझिन्स, यूजीएलबी ग्रेनेड लॉन्चरच्या ६७ राउंड्स, २२ बुलेटप्रूफ जॅकेट, दोन दुर्बीण, पाच वायरलेस सेट तसेच मेटल डिटेक्टरही नक्षलवाद्यांनी लुटल्याचेही या अधिकाऱ्याने सांगितले.