काश्मीर: महाराष्ट्रातील सुमेध गवई यांना वीरमरण

मटा ऑनलाइन वृत्त । नवी दिल्ली

काश्मीरमधील शोपियान येथे दहशतवाद्यांशी झालेल्या चकमकीत महाराष्ट्रातील सुमेध गवई या २५ वर्षीय जवानाला वीरमरण आलं आहे. गवई हे अकोला जिल्ह्यातील लोणाग्रा गावचे रहिवासी होते. सुमेध गवई शहीद झाल्याच्या वृत्तानंतर संपूर्ण गावावर शोककळा पसरली आहे.

दक्षिण काश्मीरमधील शोपियान येथील झैनापोरा भागात शोधमोहीम सुरू असताना दहशतवाद्यांनी केलेल्या अंदाधुंद गोळीबारात गवई शहीद झाले. गवई हे चार वर्षांपूर्वी लष्करात दाखल झाले होते. त्यांचा लहान भाऊही लष्करात आहे. त्यांचे आई-वडील व बहीण लोणाग्रा गावी राहतात. एक ऑगस्ट रोजीच त्यांचा वाढदिवस होता. लवकरच ते गावी येणार होते, असे सांगितलं जातं.

गवई यांच्यासह आणखी एक जवान शोपियानमधील चकमकीत शहीद झाला असून चार जवान जखमी झाले आहेत. ही चकमक अद्यापही सुरू असून लष्करानं आतापर्यंत तीन दहशतवाद्यांचा खात्मा केला आहे.