US: मुस्लिम देशांवरील बंदीने गुगल संतापले

मटा ऑनलाइन वृत्त । सॅन फ्रान्सिस्को

अमेरिकेचे राष्ट्राध्यक्ष डोनाल्ड ट्रम्प यांनी प्रसिद्ध केलेल्या नव्या व्हिसा धोरणाचा गुगलचे सीईओ सुंदर पिचाई यांनी निषेध नोंदवला असून आपल्या ट्रॅव्हलिंग स्टाफला तडकाफडकी अमेरिकेत परत बोलावले आहे.

अमेरिकेच्या राष्ट्राध्यक्षपदाची सूत्रे स्वीकारल्यानंतर डोनाल्ड ट्रम्प यांनी वादग्रस्त मुद्द्यांना हात घालायला सुरूवात केली आहे. शुक्रवारी प्रसिद्ध केलेल्या नव्या धोरणानुसार ७ मुस्लिमबहुल देशांतील नागरिकांना ३ महिने व्हिसा न देण्याचा वादग्रस्त निर्णय घेतला आहे. सरकारच्या या निर्णयानंतर गुगलने तीव्र नाराजी व्यक्त करीत या धोरणाचा निषेध नोंदवला आहे. गुगलचे सीईओ सुंदर पिचाई यांच्यासोबतच फेसबुकचे संस्थापक मार्क झुकेरबर्ग आणि नोबेल पुरस्कार विजेती मलाला युसुफझाई यांनीही डोनाल्ड ट्रम्प यांच्या नव्या धोरणाचा निषेध नोंदवला आहे.

पिचाई यांनी आपल्या कर्मचाऱ्यांना पाठवलेल्या ईमेलमध्ये म्हटले आहे, ७ मुस्लिम देशांतील नागरिकांना अमेरिकेत येण्यास बंदी घातल्याच्या निर्णयानंतर गुगलचे जवळपास १८७ कर्मचाऱ्यांना फटका बसणार आहे. वॉल स्ट्रीट जर्नलच्या रिपोर्टनुसार, या निर्णयाच्या परिणामांमुळे आम्ही चिंतेत आहोत. गुगल कर्मचारी आणि त्यांच्या सदस्यांवरील बंदीचा नक्कीच फटका बसू शकतो. चांगली टॅलेंटेड व्यक्ती अमेरिकेत येण्यापासून रोखली जाऊ शकतील, अशी भीती पिचाई यांनी व्यक्त केली आहे.

ही दुःखदायक घटना असून या आदेशाचा परिणाम अनेक सहकाऱ्यांवर होणार आहे, असे पिचाई यांनी ईमेलमध्ये म्हटले आहे. बीबीसीच्या रिपोर्टनुसार, ट्रॅव्हल करणाऱ्या १०० कर्मचाऱ्यांना गुगलने माघारी बोलावले आहे. ७ मुस्लिम देशांतील लोकांना ९० दिवस व्हिसा न देण्याचा निर्णय ट्रम्प सरकारने घेतला आहे. तसेच सीरियामधून शरणागती येणाऱ्यांनाही पुढील निर्णय होईपर्यंत येण्यास बंदी घालण्यात आली आहे.