'एक राष्ट्र, एक अभ्यासक्रम'; याचिका फेटाळली

नवी दिल्ली: 'एक राष्ट्र, एक अभ्यासक्रम'अंतर्गत ६ ते १४ या वयोगटातील मुलांना एकच अभ्यासक्रम शिकवण्यात यावा अशी मागणी करणारी याचिका आज सुप्रीम कोर्टाने फेटाळून लावली. 'या विषयावर कोर्ट काय बोलणार, सर्व काही कोर्ट करू शकणार नाही. हे शक्य नाही' अशा शब्दांत सुप्रीम कोर्टाचे सरन्यायाधीश दीपक मिश्रा यांनी ही याचिका फेटाळून लावताना म्हटले आहे.

गाझियाबादमधील एका प्राथमिक शाळेच्या साहाय्यक शिक्षिका नीता उपाध्याय यांनी सुप्रीम कोर्टात ही याचिका दाखल केली होती.

६ ते १४ वयोगटातील मुलांना संपूर्ण देशात एकसमान अभ्यासक्रम शिकवावा असे आदेश सुप्रीम कोर्टाने सरकारला द्यावेत अशी मागणी या याचिकेत करण्यात आली होती. मुलांचे अधिकार नि:शुल्क आणि सक्तीच्या शिक्षणापुरते मर्यादित ठेवू नयेत. तर, मुलांसोबत आर्थिक, सामाजिक आणि सांस्कृतिकआधारावर भेदभाव न करता गुणवत्तापूर्ण शिक्षण उपलब्ध करण्यापर्यंत या अधिकारांचा विस्तार व्हायला हावा असे या याचिकेत म्हटले आहे.

शिक्षणातील गुणवत्तेचा विचार करता या संदर्भात कोणत्याही प्रकारचा भेदभाव होता कामा नये असेही या याचिकेत म्हटले आहे. समान शिक्षण प्रणाली धर्म, वंश, जात, लिंग आणि जन्मस्थानाच्या आधारे होणारे भेदभाव नष्ट करू शकते असे या याचिकेत अधोरेखित करण्यात आले आहे.