२०२०-२१ साठी मराठा आरक्षणानुसार होणार पदव्युत्तर वैद्यकीय प्रवेश

नवी दिल्लीः करोना व्हायरसमुळे काही परीक्षापुढे ढकलण्यात आल्या आहेत. तर शाळा, कॉलेजेसही बंद आहे. पण करोनाच्या या संकटात सुप्रीम कोर्टाने वैद्यकीय शिक्षण घेणाऱ्या मराठा सामाजाच्या विद्यार्थ्यांना दिलासा दिला आहे. पदव्युत्तर वैद्यकीय प्रवेशात या वर्षी मराठा आरक्षण कायम राहणार आहे. सुप्रीम कोर्टाने मराठा आरक्षणास स्थगिती देण्यास नकार दिला आहे. तसंच मराठा आरक्षण प्रकरण प्रलंबित असल्याने यावर स्थगिती देता येणार नाही, असं कोर्टाने स्पष्ट केलंय.

पदव्युत्तर वैद्यकीय प्रवेशात मराठा आरक्षणाला स्थगिती देण्याची मागणी याचिकेतून करण्यात आली होती. सुप्रीम कोर्टाने ही याचिका फेटाळून लावली आहे. यामुळे २०२०-२१ म्हणजे यंदाच्या वैद्यकीय पदव्युत्तर प्रवेशाचा मार्ग मोकळा झाला आहे. यासोबतच मराठा आरक्षणानुसार झालेले प्रवेशही रद्द करण्याची मागणी याचिकेतून करण्यात आली होती. ती मागणीही सुप्रीम कोर्टाने फेटाळली आहे.

सुप्रीम कोर्टाने दिलेल्या निर्णयानुसार वैद्यकीय आणि दंतवैद्यक पदव्युत्तर अभ्यासक्रमांना २०२०-२१ या शैक्षणिक वर्षात मराठा आरक्षणानुसार प्रवेश दिला जाणार आहे. याचा फायदा पात्र असलेल्या मराठा विद्यार्थ्यांना होणार आहे. मे २०१९ मध्ये नागपूर खंडपीठाने पदव्युत्तर वैद्यकीय प्रवेशात मराठा आरक्षण लागू न करण्याचा निर्णय दिला होता. खंडपीठाच्या या निर्णयाला सुप्रीम कोर्टात आव्हान देण्यात आले होते. या प्रकरणी आज सुप्रमी कोर्टात सुनावणी झाली.

लॉकडाउन: काय बंद राहणार, काय सुरू राहणार?

रमजान मुबारक! पंतप्रधान नरेंद्र मोदींनी दिल्या शु...