पर्रीकर यांचा शपथविधी होणार का?

बहुमताच्या आकडेमोडीत काँग्रेस अपयशी

वृत्तसंस्था, पणजी, इंफाळ

गोवा आणि मणिपूर या दोन्ही राज्यांत काँग्रेस हा सर्वाधिक जागा मिळवणारा पक्ष म्हणून समोर आला असला तरी जोडतोडीच्या राजकारणात काँग्रेसला मागे टाकत भारतीय जनता पक्षाने मुसंडी मारली आहे. बहुमताची जादुई आकडेमोड यशस्वीपणे साध्य करत त्यांनी दोन्ही राज्यांत सत्तास्थापनेसाठी दावा केला आहे. गोव्यात मनोहर पर्रीकर आज, मंगळवारी मुख्यमंत्रीपदाची शपथ घेणार असून मणिपूरचे मुख्यमंत्रीपदाचे उमेदवार म्हणून एन. बिरेन सिंग यांचे नाव पक्षातर्फे सोमवारी जाहीर करण्यात आले. त्यामुळे या दोन्ही राज्यांत काँग्रेसची सत्ता ’हात’ची गेल्याचे चित्र आहे. काँग्रेसने लोकशाहीची ही हत्या असल्याची टीका करत सर्वोच्च न्यायालयात धाव घेतली आहे.

शपथविधीला काँग्रेसचे आव्हान

गोव्यात मनोहर पर्रीकर आज मुख्यमंत्रीपदाची शपथ घेणार असले तरी काँग्रेसने या शपथविधीला स्थगिती मिळवण्यासाठी सर्वोच्च न्यायालयात दाद मागितली आहे. त्यावर आज सकाळी सुनावणी होईल. काँग्रेसच्या नेत्यांनी राज्यपाल मृदुला सिन्हा यांनी भाजपला सत्तास्थापनेसाठी निमंत्रित करण्याचा निर्णय अवैध असल्याचे याचिकेत म्हटले आहे. भाजपचे १३, दोन अपक्ष, गोवा फॉरवर्ड पार्टी आणि महाराष्ट्रवादी गोमंतक पक्षाचे प्रत्येकी तीन, अशी कुमक मदतीला घेऊन २१चा जादूई आकडा कागदावर गाठण्यात भाजपला यश मिळाले आहे. पर्रीकर यांनी सोमवारी संरक्षणमंत्रीपदाचा राजीनामा दिला. अरुण जेटली यांच्याकडे संरक्षणमंत्रीपदाचा अतिरिक्त कारभार सोपवण्यात आला आहे.

दरम्यान, आम्हाला सत्तास्थापनेची संधी द्यावी. आमच्याकडे पुरेसे संख्याबळ असून आम्ही ते सभागृहातही सिद्ध करू शकतो, अशा आशयाचे निवेदन काँग्रेसने रात्री उशिरा राज्यपालांना दिले.

एन. बिरेन सिंग मुख्यमंत्रीपदी?

मणिपुरातही विधानसभा निवडणुकीत काँग्रेस हा सर्वांत मोठा पक्ष म्हणून समोर आला असला तरी भारतीय जनता पक्षाने अन्य पक्षांचा पाठिंबा मिळवत सत्ता स्थापनेसाठी आघाडी घेतली आहे. एन. बिरेन सिंग हे भाजपचे मुख्यमंत्रीपदाचे उमेदवार असतील, असे केंद्रीय ऊर्जामंत्री पियुष गोयल यांनी सोमवारी जाहीर केले. मणिपूरच्या राज्यपाल नजमा हेप्तुल्ला यांनी काँग्रेसचे विद्यमान मुख्यमंत्री ओ. इबोबी सिंग यांना ताबडतोब राजीनामा देण्याची सूचना केली असून त्यांच्या राजीनाम्यानंतर आपल्याला सरकारस्थापनेसाठी हालचाली सुरू करता येतील, असे म्हटले आहे. त्यानुसार इबोबी सिंग आज, मंगळवारी आपल्या पदाचा राजीनामा देतील. भाजपने २१ आमदार, एनपीपीचे चार, एलजेपीचा एक, टीएमसीचा एक आणि काँग्रेसच्या एका आमदारासह सत्ता स्थापनेचा दावा केला आहे. ६० सदस्यांच्या विधानसभेत एकूण ३२ आमदारांचा आपल्याला पाठिंबा आहे, असे भाजपचे म्हणणे आहे.