हिरे व्यापाऱ्याचा १२ वर्षांचा मुलगा बनला मुनी

सुरत

तोंडात चांदीचा चमचा घेऊन जन्माला आलेला सुरतमधील एका धनाढ्य हिरे व्यापाऱ्याच्या अवघ्या १२ वर्षांच्या मुलाने गुरुवारी आपल्या सर्व धनदौलतीवर पाणी सोडून जैन मुनी म्हणून दीक्षा घेतली. भव्य शहा असे या मुलाचे नाव असून तो सातव्या इयत्तेत शिकत आहे.

भव्य याचे वडील दीपेश शहा हे सुरतमधील हिरे व्यापारी असून त्यांना एक मुलगी आणि दोन मुलगे आहेत. भव्या याची मोठी बहीण प्रियंका हिने चार वर्षांपूर्वी, वयाच्या बाराव्या वर्षीच जैन मुनी म्हणून दीक्षा घेत घर आणि कुटुंबावर पाणी सोडले होते.

शुक्रवारी सकाळी उमरा येथील जैन संघाचे आचार्य रश्मिरत्नसुरी हे भव्य याला दीक्षा देणार आहेत.

'देवाने दाखवलेल्या मार्गावरून जात असल्याने मी खुश आहे,' अशी प्रतिक्रिया भव्य याने आपल्या दीक्षा कार्यक्रमाच्या निमित्ताने दिली आहे. 'आमचे कुटुंब अतिशय आनंदी आहे, माझ्या मुलीनेही वयाच्या बाराव्या वर्षी दीक्षा घेतली होती,' अशी प्रतिक्रिया भव्य याच्या वडिलांनी दिली.

फरारीतून शोभायात्रा

२४ मार्च रोजी भव्य याची फरारी या आलिशान गाडीतून शानदार शोभायात्रा काढण्यात आली होती. भव्य याला गाड्या आणि परफ्यूम यांसारख्या आवडी आहेत. आपली यात्रा मोठ्या गाडीतून काढली जावी, अशी इच्छा त्याने व्यक्त केली होती. त्यानुसार भव्यच्या वडिलांच्या एका मित्राने आपली गाडी या यात्रेसाठी पाठवून भव्यची इच्छा पूर्ण केली.