आम्ही दहशतवाद्यांना गाडतच राहणारः रावत

मटा ऑनलाइन वृत्त । नवी दिल्ली

जम्मू-काश्मीरमधील दहशतवाद्यांच्या घुसखोरीवरून लष्कर प्रमुख जनरल बिपीन रावत यांनी पाकिस्तानला जळजळीत उत्तर दिले आहे. सीमेपलिकडे दहशतवाद्यांचे अनेक तळ आहेत. यामुळे दहशतवादी येतच राहतील आणि आम्हीही त्यांना जमिनीत अडीच फूट गाडतच राहू, असं रावत यांनी पाकला सुनावलं आहे.

'इंडियाज मोस्ट फिअरलेस' या शूरवीर जवानांवरील पुस्तकाचं प्रकाशन राजधानी दिल्लीत करण्यात आलं. यावेळी लष्कर प्रमुख बिपीन रावत उपस्थित होते. 'आम्ही काय आहोत हे सर्जिकल स्ट्राइकनंतर शत्रूला कळलं असेलच. तसंच वेळ पडल्यास सर्जिकल स्ट्राइक पुन्हा होऊ शकतो हेही त्यांच्या लक्षात आलं आहे', असं रावत म्हणाले.

'आधीपेक्षा देशाची ताकद वाढली आहे. तसंच राष्ट्रीय सुरक्षेच्या मुद्द्यावर वेळेवर निर्णय घेण्याची क्षमताही निर्माण झाली आहे. कुठल्याही मोहीमेसाठी कधीही आणि कुठेही कारवाई करण्यासाठी लष्कराचे जवान सज्ज आहेत', असं रावत यांनी सांगितलं.

'शांत राहणं हे जवानांसमोर मोठं आव्हान असतं. कारण त्यांच्या लेखी शांती हा शब्द नाही. जेव्हा शांतता असते तेव्हा ते भविष्यातील परिस्थितींना सामोरं जाण्याची तयारी करत असतात', असं रावत यांनी स्पष्ट केलं.