बडगामात दहशदवादी मॉड्युलचा पर्दाफाश : ५ संशयित अटकेत

बडगाम : जम्मू-काश्मीर येथील बडगामात पोलिसांनी एका दहशदवादी मॅाड्युलचा पर्दाफाश केला आहे. दहशदवाद्यांना मदत करणाऱ्या ५ संशयितांना पोलिसांनी अटक केली आहे. पोलिसांनी या संशयितांवर कारवाईचा बडगा उगारत मोठे यश प्राप्त केले आहे. दहशतवाद्यांना आश्रय देण्याबरोबरच दहशतवादी संघटनेला आवश्यक ती मदत करण्यात या टोळीचा हात असल्याचा दावा जम्मू काश्मीरच्या पोलिसांनी केला आहे. दरम्यान, या संशयितांचा इस्लामिक स्टेटच्या दहशतवादी संघटनांशीही संबंध असल्याचे पोलिसांच्या प्राथमिक चौकशीत उघड झाले आहे. विशेष म्हणजे गेल्या काही दिवसांत जम्मू काश्मीरच्या पोलिसांनी अशा अनेक टोळ्यांच्या मुसक्या आवळल्या आहेत.

जम्मू काश्मीर पोलिसांनी अशा प्रकरणांची गंभीर दखल घेत याआधीही संशयितांना पोलिसी खाक्या दाखवल्या आहेत. मागच्या शुक्रवारी जैश-ए-मोहम्मदच्याही एका मॉड्युलचा पर्दाफाश करण्यात पोलिसांना यश आले होते. तसंच लाल चौकात करण्यात आलेल्या ग्रनेड हल्ल्यात हात असलेल्या जैश या संघटनेच्या ३ सहकाऱ्यांना अटक करण्यात आली होती.

नावेद उल लतीफ, शकील अहमद बंद अणि शमशाद मंजूर अशी या आरोपींची नावे आहेत.या तिघांचाही दहशतवाद संघटना वाढवण्यात आणि दरीखोऱ्यांत दहशतवादी हल्ले करण्यात सहभाग होता.त्यानंतर दहशतवादी संघटनेचे सुहैल जावेद लोन,ज़हूर अहमद खान आणि सोहैब मंजूर या संघटनेच्या महत्वाच्या ३ सदस्यांना पुलवामा जिल्ह्यात पोलिसांनी सोमवारी अटक केली होती.तर प्रतिबंधित दहशतवादी संघटनेचा हिजबुल मुजाहिदीनलाही मंगळवारी किश्तवाड जिल्ह्यात अटक करण्यात आली होती.