यूपीः मंदिरात मिळणार दुधानं बनवलेला प्रसाद

मटा ऑनलाइन वृत्त । लखनऊ

उत्तर प्रदेशातील मंदिरात तसेच धार्मिक स्थळांवर गायीच्या दुधापासून बनवलेला प्रसाद भक्तांना मिळणार आहे. गायीच्या दुग्ध पदार्थांना प्रोत्साहन देण्यासाठी हा निर्णय घेतला असून याची सुरुवात नवरात्रीपासून केली जाणार आहे, अशी माहिती दूध डेअरी विकासमंत्री नारायण चौधरी यांनी दिली.

दुधाने बनवलेले पदार्थ बाजारात आणण्यासाठी सरकारने प्रयत्न सुरू केले आहेत. यासाठी विंध्याचल, काशी, मथुरा, अयोध्या यासारख्या मोठ्या तिर्थस्थळांवर गायीच्या दुधापासून बनवलेली मिठाई उपलब्ध करण्यासाठी सरकारने तयारी केली आहे. दुधाचे उत्पादन वाढल्यानंतर गायीच्या दुधाच्या किंमतीही वाढणार असल्याचे संकेत चौधरी यांनी दिले आहेत. दुधाच्या किंमती वाढल्या तर लोक गायीचे संरक्षण करतील. गायीच्या संरक्षणावर बोलले तर विरोधक त्याचा संबंध हिंदुत्वाशी लावतात. परंतु, दूध हे प्रतिरोधक क्षमता वाढवणारे आहे. तसेच किडनी, कँसर यासारखे आजार रोखण्यासाठी उपयुक्त ठरते, असेही नारायण चौधरी यांनी सांगितले.

दुधाचे दर वाढणार

उत्तर प्रदेशात म्हशीचे दूध ३५ रुपये लीटर तर गायीचे दूध २२ रुपये लीटर मिळतेय. सरकार लवकरच दुधाचे दर वाढवणार असून गायीचे दूध ४० ते ४२ रुपये करण्याच्या तयारीत आहे. छत्तीसगडमध्ये गायीचे दूध ६० रुपये लीटर विकले जाते तर मथुरेत ४५ रुपये लीटर विकले जात असल्याचे चौधरी म्हणाले.