‘ताजमहाल केवळ एक सुंदर कब्रस्तान’

प्रेमाचे सर्वांगसुंदर प्रतीक, अशी ताजमहालाची जगभरात ओळख आहे. जगातील मोजक्या आश्चर्यांपैकी एक आणि सौंदर्याचा मानबिंदू, त्याला मानले जाते. मात्र, ताजमहालला वाइट ठरवण्याच्या राजकीय टीका टिप्पणींच्या शर्यतीत आता हरयाणाच्या मंत्र्यांनीही उडी घेतली. यांच्या मते, ताजमहाल केवळ एक सुंदर कब्रस्तान आहे. तसेच याची प्रतिकृती घरात ठेवणेदेखील एक अपशकुन आहे, असे वादग्रस्त वक्तव्य हरयाणाचे आरोग्यमंत्री अनिल विज यांनी केले आहे.

याविषयीचे ट्वीट केल्यानंतर अनिल विज यांनी माध्यमांशी संवाद साधला. त्यामध्ये सुद्धा ते आपल्या वक्तव्यावर ठाम होते. ‘ताजमहाल एक कब्रस्तान असल्याने लोक त्याची प्रतिकृतीसुद्धा घरात ठेवत नाहीत. अशा प्रकारच्या प्रतिकृती घरात ठेवणे ते अपशकुन मानतात,’ असा दावा विज यांनी केला.

भारताचा जगप्रसिद्ध ऐतिहासिक वारसा असलेल्या ताजमहलला यापूर्वी भाजप आमदार संगीत सोम यांनी आपल्या संस्कृतीवरील डाग म्हटले होते. तर, उत्तरप्रदेशचे मुख्यमंत्री योगी आदित्यनाथ यांनी राज्याच्या टुरिस्ट टेस्टिनेशनच्या पत्रिकेत ताजमहलला समाविष्ट केलेच नाही. यानंतर त्यांनी स्पष्टीकरण देत, राज्याच्या कॅलेंडरवर ताजमहलाचे फोटो जारी केले होते.