'दहशतवादाला पोसणारा निधी रोखा'

वृत्तसंस्था, श्रीनगर

जम्मू-काश्मीरमधील सुरक्षा यंत्रणांबाबत समाधान व्यक्त करतानाच, दहशतवादाला मिळणारा निधी रोखा, दहशतवाद व दहशतवादी यांबाबत कोणतीही दयामाया दाखवू नका, असे स्पष्ट निर्देश केंद्रीय गृहमंत्री अमित शहा यांनी गुरुवारी येथे दिले. ते राज्याच्या दोन दिवसांच्या दौऱ्यावर आले होते. गृहमंत्रालयाची सूत्रे स्वीकारल्यानंतर त्यांचा राजधानी दिल्लीबाहेरील हा पहिलाच दौरा आहे. राज्यपाल सत्यपाल मलिक यांनी राजशिष्टाचार मोडून शहा यांचे विमानतळावर स्वागत केले.

घुसखोरी व दहशतवाद यांच्याशी झुंज देण्याविषयी शहा यांनी जम्मू-काश्मीर पोलिसांचे कौतुक केले. राज्यातील महत्त्वाच्या स्थळांना दहशतवाद्यांशी मुकाबला करताना हुतात्मा झालेल्या पोलिसांची नावे द्यावीत, असेही त्यांनी सांगितले. अमित शहा यांनी १ जुलैपासून सुरू होत असलेल्या अमरनाथ यात्रेच्या तयारीचाही आढावा घेतला.