​ लेहमध्ये उभारणार सर्वांत उंच रेल्वेमार्ग

नवी दिल्ली : काश्मीर खोऱ्याला रेल्वेच्या नकाशावर आणल्यानंतर आता लेहलाही रेल्वेने जोडण्याचे प्रयत्न सुरू आहेत. या आठवड्यात लेहमधील प्रस्तावित रेल्वेमार्गासाठी सर्वेक्षण हाती घेण्यात येणार आहे. बिलासपूर-मनाली-लेह असा हा ४९८ किलोमीटर लांबीचा लोहमार्ग उभारण्यात येणार असून, तो समुद्रसपाटीपासून ३ हजार ३०० मीटर उंचीवर आहे. सध्या चीनमधील क्विंघाई-तिबेट हा रेल्वेमार्ग हा जगातील सर्वांत उंचीवरचा रेल्वेमार्ग म्हणून ओळखला जातो. बिलासपूर-मनाली-लेह हा रेल्वेमार्ग पूर्ण झाल्यानंतर तो सर्वांत उंचीवरील लोहमार्ग ठरेल. रेल्वेमंत्री सुरेश प्रभू यांच्या हस्ते २७ जूनला या सर्वेक्षणाला सुरुवात होईल. या सर्वेक्षणासाठी १५७.७७ कोटी रुपये खर्च अपेक्षित आहे.

संरक्षण मंत्रालयाने चीनच्या सीमारेषेजवळ सामरिकदृष्ट्या महत्त्वाचे असे चार लोहमार्ग ठरवले असून, बिलासपूर-लेह हा यापैकीच एक आहे. ही रेल्वे बिलासपूर आणि लेहमधील सुंदरनगर, मनाली, तांडी, केलाँग, कोकसार, दारचा, उपशी आणि कारू या ठिकाणांना जोडेल.