वृत्तसंस्था, तिरुवनंतपुरम
लष्कर-ए-तोयबा या दहशतवादी संघटनेचे सहा दहशतवाद्यांनी श्रीलंकामार्गे तामिळनाडूतील कोइम्बतूरमध्ये घुसल्याची माहिती भारतीय गुप्तचर यंत्रणांना मिळाली आहे. या माहितीनंतर तामिळनाडूमध्ये अतिदक्षतेचा इशारा देण्यात आला आहे. ही माहिती मिळाल्यानंतर राज्याचे पोलिस महासंचालक लोकनाथ बेहेरा यांनी संपूर्ण राज्यात दक्षतेचा इशारा दिला आहे.
चेन्नई शहरातील सुरक्षेत वाढ करण्यात आली आहे, तसेच महत्त्वाच्या ठिकाणांवर अतिरिक्त पोलिसबळ तैनात करण्यात आले आहे. या व्यतिरिक्त क्यूआरटी टीमही तैनात करण्यात आली आहे. प्रमुख ठिकाणांवर लोकांची तपासणीही करण्यात येत आहे. या दहशतवाद्यांना भारतात प्रवेश करण्यासाठी श्रीलंकेतील काही लोकांनी मदत केल्याची माहितीही गुप्तचर यंत्रणांच्या हाती लागली आहे.
बस थांबे, रेल्वे स्थानके आणि विमानतळे अशा गर्दीच्या ठिकाणी अधिक दक्षता बाळगण्यास सांगण्यात आले असून, एखादी घटना किंवा व्यक्ती संशयित असल्याचे आढळल्यास त्वरित पोलिसांना कळविण्याचे आवाहन नागरिकांना करण्यात आले आहे.