बिहारमध्ये भाजपच्या आश्वासनानंतर तामिळनाडूचीही घोषणा, करोना लस मोफत देणार

चेन्नई: बिहारमध्ये ( bihar) करोना व्हायरसवरील लस (coronavirus vaccine) मोफत देण्याचं आश्वासन भाजपने आपल्या निवडणूक जाहीरनाम्यात केल्यानंतर यावरून आता इतर राज्यांमध्येही चढाओढ सुरू झाली आहे. तामिळनाडूने अशीच घोषणा केली आहे. करोनाची लस तामिळनाडूत मोफत दिली जाईल, असं राज्याचे मुख्यमंत्री ई. पलानीस्वामी यांनी सांगितलं. तामिळनाडू पुढील वर्षी विधानसभा निवडणुका होणार आहेत.

करोनावरील लस तयार होताच ती नागरिकांना मोफत उपलब्ध करून दिली जाईल, असं मुख्यमंत्री पलानीस्वामी म्हणाले. बिहार विधानसभा निवडणुकीच्या जाहीरनाम्यात भाजपाने करोनावरील लस राज्यातील जनतेला मोफत देण्याची घोषणा केलीय. यावरून विरोधी पक्षांनी भाजपवर जोरदार टीका केलीय.

पंतप्रधान नरेंद्र मोदी यांनी मंगळवारी देशाला संबोधित करता करोनावरील लशीचा उल्लेख केला होता. करोनावर लस तयार करण्यासाठी जगभरात काम सुरू आहे. आपल्या देशातील शास्त्रज्ञ देखील लस बनण्यासाठी जीव ओतून काम करत आहेत. करोनाची लस येईल तेव्हा ती प्रत्येक नागरिकापर्यंत लवकरात लवकर कशी पोहोचेल, यासाठी तयारी सुरू आहे, त्यावर वेगाने काम केलं जात आहे, असं पंतप्रधान मोदी म्हणाले होते.

बिहार निवडणूक: प्रत्येक बिहारीला मोफत करोना लस टोचणार; भाजपची घोषणा

बिहार निवडणूक: भाजपचे नेते रुडी आणि शाहनवाझ हुसेन यांना करोनाची लागण

येत्या काही महिन्यांत भारताकडे करोनावरील लस उपलब्ध असेल, अशी अपेक्षा अलिकडेच केंद्रीय आरोग्यमंत्री हर्षवर्धन यांनी व्यक्त केलीय. सीरम इन्स्टिट्यूट ऑफ इंडिया आणि भारत बायोटेक या दोन कंपन्या लवकरच करोना लशींच्या क्लिनिकल चाचणीचा अंतिम टप्पा सुरू करू शकतात, असं हर्षवर्धन यांनी सांगितलं होतं.