महाभारतावर टिपण्णी; कमल हसन विरोधात समन्स

मटा ऑनलाइन वृत्त । चेन्नई

महाभारतावर वादग्रस्त टिपण्णी केल्याप्रकरणी अभिनेता कमल हसनला तामिळनाडूतील एका कोर्टाने आज समन्स बजावले आहे. कमल हसनला ५ मे रोजी प्रत्यक्ष कोर्टात हजर राहण्याचे आदेश कोर्टाने दिले असून कोर्टासमोर त्याला आपली बाजू मांडावी लागणार आहे.

कमल हसनने गेल्या महिन्यात एका तमिळ वृत्तवाहिनीवर बोलताना महाभारतातील वस्त्रहरणाच्या प्रसंगावर बोट ठेवत टीका केली होती. एका महिलेवर जुगार खेळला जातो. तिचं भरसभेत वस्त्रहरण केलं जातं आणि हा प्रसंग ज्या ग्रंथात आहे त्याच ग्रंथाला आपल्या देशात मोठा मान दिला जातो, असे कमल हसन म्हणाला होता. कमल हसनच्या या विधानावर आक्षेप घेत हिंदू मक्कल कच्ची (एचकेएम) या संघटनेने तिरुनेल्वेली जिल्हा कोर्टात जनहित याचिका दाखल केली आहे. कलम हसन यांचं विधान हिंदूविरोधी आहे. या विधानाने हिंदूंच्या भावना दुखावल्या गेल्या आहेत, असे या याचिकेत नमूद करण्यात आले आहे. याप्रकरणी आज कोर्टाने कमल हसनला समन्स बजावले असून ५ मे रोजी कोर्टात हजर राहण्याचे आदेश दिले आहेत.

दरम्यान, बसवेश्वर मठाचे स्वामी प्रणवनंद यांनीही कमल हसनविरोधात पोलिसांकडे तक्रार केली असून कमल हसनने माफी मागावी अशी मागणी केली आहे.