TCS: 'ही' कौशल्य येणाऱ्यांना टीसीएसमध्ये दुप्पट पगार

बेंगळुरू :

टाटा कन्सल्टन्सी सर्व्हिसेस अर्थात टीसीएस ही कंपनी भारतातल्या सर्वाधिक वेतन देणाऱ्या कंपन्यांपैकी एक आहे. टीसीएस अत्याधुनिक डिजीटल कौशल्यांवर अधिक भर देत आहे. हे कौशल्य असणाऱ्या फ्रेशर्सनाही कंपनी नोकरी देत आहे, शिवान त्यांना आकर्षक सॅलरी पॅकेजही देत आहे.

टीसीएसमध्ये नुकतीच एक हजार फ्रेशर इंजिनीअर्सची भरती झाली आहे. कॅम्पसमधून जे उमेदवार निवडून येतात त्यांच्यापेक्षा या फ्रेशर्सना कंपनी दुप्पट वेतन देत आहे. आयटी क्षेत्रात सर्वसामान्यपणे अभियंत्यांना सुरुवातीला ३.५ लाख रुपये वार्षिक वेतन असतं. पण आता डिजीटल कौशल्यनिपुण अभियंत्यांना वार्षिक ६.५ लाख रुपये सॅलरी पॅकेज मिळत आहे.

नॅशनल क्वालिफायर टेस्ट या चाचणीच्या माध्यमातून उमेदवारांची निवड केली जात आहे. ही चाचणी डिजिटल स्कीलवर आधारित आहे. या चाचणीनंतर उमेदवारांच्या मुलाखतीही घेतल्या जातात. ऑनलाइन टेस्टमुळे दूरवरच्या उमेदवारांपर्यंतदेखील कंपनीला पोहोचता येतं. यामुळे कंपनीची नियुक्ती प्रक्रियादेखील कमी कालावधीत होते. या टेस्टमुळे कंपनी २ हजार उमेदवारांपर्यंत पोहोचत आहे.

मशीन लर्निंग, आर्टिफिशल इंटेलिजन्स आणि डेटा अॅनालिसीस या क्षेत्रातली कौशल्ये येणाऱ्या उमेदवारांना अधिक वेतन मिळत आहे. कारण या विशिष्ट कौशल्यांना अधिक मागणी आहे आणि कंपनीला ती शिकवायची झाली तर खूप खर्च करावा लागतो, अशी माहिती टीसीएसचे कार्यकारी उपाध्यक्ष आणि ग्लोबल ह्युमन रिसोर्सेसचे प्रमुख अजय मुखर्जी यांनी दिली.