चहा विक्रेत्याच्या मुलीला तीन कोटींची शिष्यवृत्ती

बुलंदशहर:

उत्तर प्रदेशच्या बुलंदशहरातील एका चहा विक्रेत्याच्या मुलीने गरिबीवर मात करत सीबीएसई बोर्डाच्या इयत्ता १२ वीच्या परीक्षेत ९८ टक्के मार्क्स मिळविले आहेत. एवढेच नव्हे तर या मुलीला अमेरिकेच्या बॉबसन महाविद्यालयात पुढील शिक्षणासाठी प्रवेश मिळाला असून अमेरिकेची ३.८ कोटींची शिष्यवृत्तीही मिळाली आहे. अत्यंत गरीबी आणि घरात कोणतीही शैक्षणिक पार्श्वभूमी नसताना सुदीक्षा भाटी हिने हे उत्तुंग यश मिळविले आहे.

१२ वीच्या परीक्षेत ९८ टक्के मार्क्स मिळवून सुदीक्षा जिल्ह्यात पहिली आली आहे. अमेरिकेच्या बॉबसन महाविद्यालयाने तिला चार वर्षाच्या कोर्ससाठी ३.८ कोटींची शिष्यवृत्ती मंजूर केली आहे. तिच्या या यशाबद्दल तिने भरभरून गप्पा मारल्या. ती म्हणाली, 'शिक्षण पूर्ण करण्याचं स्वप्न मला कठीण वाटत होतं. २०११ मध्ये मला विद्याज्ञान लीडरशीप अकादमी शाळेत प्रवेश मिळाला. त्यामुळे शिक्षण सुरू ठेवणं मला सोपं झालं. या शाळेत दलित आणि मागासवर्गीय विद्यार्थी मोठ्या प्रमाणावर शिकतात. त्यामुळे मलाही या शाळेत शिकण्याची संधी मिळाली. सुरुवातीला माझ्या कुटुंबीयांनी आणि नातलगांनी त्याला विरोध केला होता. मात्र नंतर आई-वडिलांनी मला शिक्षण सुरू ठेवण्यासाठी प्रोत्साहन दिलं.'

'मला शिष्यवृत्ती मिळाल्याचं ऐकून माझी आई खूप खूश झाली आहे. देवानं तिची प्रार्थना ऐकली असं तिला वाटतंय. आता अमेरिकेत जाऊन शिक्षण घेण्याची आणि माझ्या क्षमतेचा पूर्ण वापर करण्याची संधी मला मिळेल. आर्थिक क्षमता नसतानाही मी हा पल्ला गाठू शकले याचा मला सर्वाधिक आनंद झालाय,' असं सुदीक्षाने सांगितलं.