काश्मीर: दहशतवादी हल्ल्यात ३ जवान शहीद

वृत्तसंस्था, श्रीनगर

गेल्या काही दिवसांपासून जम्मू-काश्मीरमध्ये लष्करी जवानांवर दहशतवादी हल्ले आणि फुटीरतावादी समर्थकांकडून दगडफेकीच्या घटना वाढीस लागल्या असतानाच गुरुवारीही काश्मीरच्या भूमीवर जवानांचे रक्त सांडले. उत्तर काश्मीरच्या कुपवाडा जिल्ह्यातील पंजगाम लष्करी तळावर तीन दहशतवाद्यांनी पहाटेच्या सुमारास हल्ला केला. लष्कराच्या चोख प्रत्युत्तरात दोन दहशतवाद्यांना कंठस्नान घालण्यात आले खरे; पण, या धुमश्चक्रीत एका कॅप्टनसह तीन जवान शहीद आणि पाच जवान जखमी झाले.

पहाटे चारच्या सुमारास काळ्या पठाणी वेशात आलेल्या तीन दहशतवाद्यांनी तोफखाना युनिटमध्ये घुसखोरी करत बेछूट गोळीबार सुरू केला. त्यानंतर ते तळावरील अधिकाऱ्यांच्या बराकीपर्यंत पोहोचण्यात यशस्वी झाले; मात्र, तेथील जवानांनी तुफान गोळीबार करत दहशतवाद्यांना पुन्हा तळाच्या प्रवेशद्वारापर्यंत मागे लोटले. अर्धा तास चाललेल्या या धुमश्चक्रीत दोन दहशतवाद्यांना ठार करण्यात आले पण तिसरा अंधाराचा फायदा घेऊन पळून गेला. शहीद कॅप्टनचे नाव आयुष यादव असून उत्तर प्रदेशच्या कानपूरचे असलेले यादव तीन वर्षांपूर्वीच लष्करात दाखल झाले होते. अन्य शह‌दिांमध्ये सुभेदार भूपसिंग गुज्जर आणि नाईक बी. वेंकट रामण्णा यांचा समावेश आहे. पाच जखमी जवानांवर श्रीनगरच्या लष्करी रुग्णालयात उपचार सुरू आहेत.

दहशतवाद्यांकडून तीन एके रायफली, च‌निी बंदुका, अनेक काडतुसे आणि बॉम्ब हस्तगत करण्यात आले आहेत. दहशतवादी सीमेपलिकडून आल्याचा लष्कराचा प्राथमिक अंदाज असून, फरार दहशतवाद्याचा शोध सुरू असल्याचे सांगण्यात आले.

जमावाची लष्करावर दगडफेक, एकाचा मृत्यू

ही चकमक पार पडल्यानंतर लष्करी जवानांवर स्थानिकांच्या जमावाकडून दगडफेक होण्याचा प्रकार घडला. मृत दहशतवाद्यांचे देह दफनविधीसाठी आपल्या हवाली करण्याची मागणी हा जमाव करत होता. मात्र, लष्कराने त्यास नकार देताच जमावाने दगडफेक सुरू केली. त्यांना रोखण्यासाठी केलेल्या गोळीबारात एक ७५ वर्षीय ज्येष्ठ नागरिकाचा मृत्यू झाला.