‘एके ५६’ हिरावून दहशतवादी फरार

वृत्तसंस्था, श्रीनगर

भारतीय जनता पक्षाचे नेते गुलाम मोहम्मद छोपान यांच्या निवासस्थानी घुसून सहा दहशतवाद्यांनी त्यांच्या सुरक्षारक्षकाकडून एके ५६ रायफल हिसकावून घेतली.

बडगाम जिल्ह्यातील छंदुरा गावात हा प्रकार घडला. दहशतवादी नंतर पळून गेले. सकाळी नऊला हा प्रकार घडला तेव्हा छोपान निवासस्थानीच होते. पोलिसांनी सांगितले की, कॉन्स्टेबल बशीर अहमदला धक्काबुक्की करून दहशतवाद्यांनी शस्त्र पळवून नेले. संपूर्ण परिसराला अतिदक्षतेचा इशारा देण्यात आला असून गावाच्या सीमा बंद करण्यात आल्याचे पोलिस अधिकाऱ्यांनी सांगितले. दरम्यान, गेल्या काही दिवसांपूर्वी केंद्रीय राखीव पोलिस दलाच्या पंपूर येथील स्थळावर दहशतवाद्यांनी केलेल्या गोळीबारात आठ अधिकारी शहीद झाले आहेत. या हल्ल्यात दोन दहशतवाद्यांना ठार करण्यात दलाला यश आले होते.

‘हिज्बुल’चा कमांडर धुमश्चक्रीमध्ये ठार

हिज्बुल मुजाहिदीनच्या एका मोठ्या कमांडर दहशतवाद्याला सुरक्षा रक्षकांनी मंगळवारी धुमश्चक्रीत ठार केले. कुपवाडा जिल्ह्यात हा संघर्ष झाला. समीर वणी उर्फ जान असे त्याचे नाव आहे. नगरी गावात झालेल्या चकमकीत तो ठार झाल्याचे पोलिसांनी सांगितले. दहशतवादी लपल्याची माहिती मिळताच, सुरक्षा रक्षकांनी एका घराभोवती वेढा दिला. त्यावेळी झालेल्या चकमकीत जान ठार झाला.