श्रीनगरः अतिरेक्यांच्या गोळीबारात १ जवान शहीद

मटा ऑनलाइन वृत्त । श्रीनगर

देशभरात ७०वा स्वातंत्र्यदिन उत्साहात साजरा होत असताना, पंतप्रधान नरेंद्र मोदी लाल किल्ल्यावरून भाषण करत असताना, श्रीनगरमधील नौहट्टा भागात दहशतवाद्यांनी सीआरपीएफ कॅम्पवर हल्ला केला. त्यावेळी झालेल्या चकमकीत कमांडर प्रमोद कुमार शहीद झाले असून दोन दहशतवाद्यांना कंठस्थान घालण्यात आलं आहे. अन्य सहा जवान जखमी असून चकमक अजूनही सुरू आहे.

स्वातंत्र्यदिनी दहशतवादी घातपात घडवण्याची शक्यता लक्षात घेऊन सर्वत्र 'हाय अॅलर्ट' जाहीर करण्यात आला आहे. राजधानी दिल्लीला तर पोलीस छावणीचं स्वरूप आलं आहे. पंतप्रधान नरेंद्र मोदी यांनी ७.३० वाजता ऐतिहासिक लाल किल्ल्यावर तिरंगा फडकवला आणि देशभरात आनंदाला उधाण आलं. त्यानंतर ते देशवासियांशी संवाद साधत असतानाच, जम्मू-काश्मीरची राजधानी श्रीनगरमध्ये गोळीबाराचा आवाज घुमला. काही दहशतवाद्यांनी सीआरपीएफच्या एका कॅम्पला लक्ष्य केलं. त्यांच्या अंदाधुंद गोळीबाराला जवानांनी चोख प्रत्युत्तर दिलं. त्यांच्यातील चकमकीदरम्यान कमांडर प्रमोद कुमार यांना आपले प्राण गमवावे लागले. त्यानंतर, नौहट्टा परिसर रिकामा करून हल्ला तीव्र करत जवानांनी दोन अतिरेक्यांना कंठस्नान घातलं आहे. आणखीही काही दहशतवादी लपले असून त्यांचाही खात्मा करण्याचे जवानांचे प्रयत्न सुरू आहे.

दरम्यान, जखमी जवानांना हॉस्पिटलमध्ये दाखल करण्यात आलं असून त्यांच्यापैकी एकाची प्रकृती चिंताजनक असल्याचं डॉक्टरांनी सांगितलं.