Jammu-Kashmir:बांदीपोरात लष्करी तळावर दहशतवादी हल्ला

जम्मू-काश्मीर : जम्मू-काश्मीरमधील बांदीपोरा भागातल्या हाजीन येथे दहशतवाद्यांनी मंगळवारी रात्री उशिरा लष्करी तळावर हल्ला केला. १३ राष्ट्रीय रायफल्स आणि हाजीन पोलीस ठाण्याच्या दोन्ही बाजूंनी सुमारे ४ ते ६ दहशतावादी आले आणि लष्करी तळ आणि पोलिसांवर गोळीबार सुरू केला. ही चकमक अजूनही सुरू आहे.

लष्कराने या संपूर्ण भागाला घेराव घातला आहे. सध्या दोन्ही बाजूंकडून गोळीबार सुरू आहे. आसपासच्या लोकांना घरातून बाहेर पडण्यास सैन्याने मज्जाव केला आहे. ४ ते ६ दहशतवादी असल्याची शक्यता सूत्रांनी व्यक्त केली आहे.

मागील आठवड्यातही दहशतवाद्यांनी शोपियाँ आणि पुलवामात सीआरपीएफच्या जवानांवर ग्रेनेड हल्ला केला होता. या हल्ल्यात अनेक सैनिक जखमी झाले होते. केंद्र सरकारने रमजानच्या महिन्याच्या पार्श्वभूमीवर शस्त्रसंधी जाहीर केल्यानंतर दहशतवादी घटनांमध्ये वाढ झाली आहे.