वृत्तसंस्था, बेंगळुरू
कर्नाटकात मोठी उलथापालथ झाल्यानंतर भाजपचे सरकार स्थापन झाले. आता अपात्र ठरलेले आमदार नारायण गौडा यांनी एक मोठा दावा केला आहे. मुख्यमंत्री बी. एस. येडियुरप्पा यांनी कृष्णराजपेट मतदारसंघाच्या विकासासाठी एक हजार कोटी रुपये दिले, त्यांना फक्त ७०० कोटी रुपये मागितले होते, असा दावा या आमदाराने केला. हे पैसे विकासकामासाठीच खर्च झाले असल्याचेही गौडा यांनी स्पष्ट केले.
कार्यकर्त्यांशी बोलताना नारायण गौडा म्हणाले, 'एक जण पहाटे ५ वाजता (कुमारस्वामी सरकार पडण्यापूर्वी) माझ्याकडे आला आणि येडियुरप्पा यांच्या निवासस्थानी नेले. जेव्हा आम्ही येडियुरप्पा यांच्या निवासस्थानी दाखल झालो, तेव्हा ते देवपूजा करत होते. मी आत गेल्यानंतर त्यांनी बसायला सांगितले. मुख्यमंत्रिपदासाठी आपल्याला पाठिंबा द्यावा, असे आवाहन येडियुरप्पांनी केले.' यासोबतच गौडा म्हणाले, 'मी कृष्णराजपेट मतदारसंघाच्या विकासासाठी ७०० कोटी रुपये मंजूर करण्याची विनंती केली. त्यांनी (येडियुरप्पा) ३०० कोटी रुपये जास्त देण्याचे आश्वासन दिले. यानंतर त्यांनी तो निधी मंजूरही केला. अशा चांगल्या माणसाला आपण समर्थन देऊ नये का? मी याच कारणांमुळे पाठिंबा दिला. अपात्र ठरलेल्या आमदारांशी माझा काहीही संबंध नसल्याचेही येडियुरप्पांनी यानंतर सांगितले.'